Eftirlit með öryggi vara og þjónustu

Öryggi vöru og þjónustu er aðalatriði fyrir neytendur. Nokkrir aðilar koma að öryggiseftirliti.

Öryggi matvæla

Matvælastofnun fer með yfirumsjón matvælaeftirlits. Þá eru rannsóknir á matvælum meðal annars gerðar hjá Matís ohf.

Heilbrigðisnefndir undir yfirumsjón Matvælastofnunar hafa opinbert eftirlit með framleiðslu og dreifingu matvæla, að svo miklu leyti sem það er ekki falið öðrum. Í umboði heilbrigðisnefnda starfa heilbrigðisfulltrúar hjá heilbrigðiseftirliti sveitarfélaga.

Aðrar vörur

Vörur sem seldar eru á Evrópska efnahagssvæðinu eiga að uppfylla kröfur sem settar eru í lögum um öryggi vörunnar. Framleiðendur, innflytjendur og aðrir seljendur vöru bera ábyrgð á að hún uppfylli öll skilyrði sem um hana gilda. Ef vörur uppfylla ekki skilyrði um öryggi ber að afturkalla þær og leggja bann við frekari sölu.

Hér á landi fer Húsnæðis- og mannvirkjastofnun (HMS) með mál er varða almennt öryggi vara og annast markaðseftirlit. Það er einnig hlutverk HMS að annast heildarskipulag og samhæfingu opinberrar markaðsgæslu á Íslandi.

• Á vefsíðu Vöruvaktarinnar geta neytendur nálgast allar helstu upplýsingar og fræðslu um vörur sem ber að varast, á einum stað. Þar er einnig hægt að senda inn ábendingar um vörur sem mögulega uppfylla ekki kröfur

Öryggi í umhverfi

Umhverfis- og orkustofnun fer, í samstarfi við heilbrigðiseftirlit/-fulltrúa á landinu öllu, með mál er varða heilsusamlegt umhverfi, aðbúnað og öryggi innanhúss, hjá stofnunum og fyrirtækjum sem almenningur sækir þjónustu til. Umhverfis- og orkustofnun hefur einnig eftirlit með öryggi leiksvæða og sundstaða.

Slysavarnir

Embætti landlæknis er faglegur ráðgjafi stjórnvalda um slysavarnir. Starfsemi embættis landlæknis á sviði slysavarna snýr að fræðslu, ráðgjöf, rannsóknum og vinnu við forvarnaverkefni. Markmiðið er að draga úr heilsutjóni og dauðsföllum af völdum slysa.

Vert að skoða

• Embætti landlæknis

• Húsnæðis- og mannvirkjastofnun

• Matvælastofnun

• Umhverfis- og orkustofnun

• Neytendamál á vef Stjórnarráðs Íslands

• Vöruvaktin

Lög og reglugerðir

• Lög um hollustuhætti og mengunarvarnir

• Lög um matvæli

• Lög um öryggi vöru og opinbera markaðsgæslu

• Reglugerð um öryggi leikfanga og hættulegar eftirlíkingar

• Reglugerð um öryggi leiksvæða og leikvallatækja og eftirlit með þeim