Umsækjendur um dvalarleyfi geta því miður ekki skráð sig inn á vef Útlendingastofnunar til að fá upplýsingar um stöðuna á umsókn sinni.

Á upplýsingasíðu um stöðu mála og afgreiðslutíma getur þú fylgst með því hvaða umsóknir er verið að taka til vinnslu út frá upplýsingum um hvenær umsóknir voru lagðar fram. Umsóknir sem bárust síðar en í þeim mánuði sem tiltekinn er á síðunni bíða þess að verða teknar til vinnslu.

Á meðan umsóknir bíða þess að verða teknar til vinnslu fást ekki frekari upplýsingar varðandi umsóknina í síma, tölvupósti eða netspjalli.

Ekki er hægt að segja nákvæmlega til um hversu lengi þú þarft að bíða eftir svari við umsókn um dvalarleyfi sem maki, barn eða foreldri. Margt hefur áhrif á biðtímann, til dæmis hversu margar umsóknir bíða afgreiðslu hjá Útlendingastofnun, hvort þú hafir lagt fram fullbúna umsókn eða hvort við þurfum að óska eftir frekari upplýsingum frá þér.

Árið 2025 var meðalafgreiðslutími samþykktra umsókna um fyrstu dvalarleyfi á grundvelli fjölskyldusameiningar 7,5 mánuðir.

Nei það er ekki hægt að óska eftir flýtimeðferð.

Fullbúnar umsóknir, sem lagðar eru fram með öllum nauðsynlegum fylgigögnum á því formi sem krafist er, er hægt að afgreiða hraðar.

Afgreiðslutíminn getur lengst ef:

• umsókn hefur ekki verið fyllt út nægilega vel,

• kalla þarf eftir frekari gögnum,

• boða þarf umsækjanda í viðtal eða

• umsækjandi hefur óskað eftir undanþágu frá skilyrðum.

Til að draga umsókn til baka þarftu að hafa samband við Útlendingastofnun.

Upplýsingar um nafn, fæðingardag og netfangið sem þú skráðir í umsóknina þína þurfa að koma fram í erindinu.

Afgreiðslugjald er ekki endurgreitt þótt þú hættir við umsókn.

Viðbótargögn, sem ekki þurfa að vera í frumriti, má senda með tölvupósti á utl@utl.is. Gögnin þurfa að vera merkt með fullu nafni umsækjanda og fæðingardegi.

Gögn sem leggja þarf fram í frumriti á pappír getur þú sent í pósti til Útlendingastofnunar að Dalvegi 18 í Kópavogi, afhent í afgreiðslu eða lagt í skilakassa í anddyri.

Til að láta vita um breytingar hjá þér, til dæmis nýtt heimilisfang, símanúmer eða netfang, þarftu að hafa samband við Útlendingastofnun.

Þú ættir einnig að láta okkur vita um nýjar upplýsingar sem gætu haft áhrif á umsókn þína, til dæmis ef þú hefur fengið nýtt vegabréf, gengið í hjónaband eða eignast barn.

Makar og börn

Ef þú varst í lögmætri dvöl á Íslandi þegar þú lagðir fram umsókn um dvalarleyfi sem maki eða barn, þá máttu almennt dvelja á landinu á meðan umsókn þín er til meðferðar hjá Útlendingastofnun. Lögmæt dvöl þýðir að þú hafir dvalið hér á landi á grundvelli 90 daga áritunarfrelsis, gildrar vegabréfsáritunar eða gilds dvalarleyfis þegar umsókn var lögð fram.

Þetta gildir hins vegar ekki ef maki þinn eða foreldri, sem þú sækir um fjölskyldusameiningu við, er handhafi eða umsækjandi um dvalarleyfi á grundvelli náms eða samstarfssamnings/þjónustusamnings. Í slíkum tilvikum mega umsækjendur ekki dvelja á landinu lengur en gildistími áritunar segir til um, ef þeir þurfa áritun til Íslands, eða ekki lengur en 90 daga áritunarfrelsið varir, ef þeir þurfa ekki áritun til Íslands, nema ríkar sanngirnisástæður eigi við.

Foreldrar

Ef þú þarft áritun til að ferðast til Íslands máttu hvorki vera á landinu þegar umsókn um dvalarleyfi sem foreldri er lögð fram né á meðan umsóknin er í vinnslu. Slíkri umsókn verður synjað.

Ef þú þarft ekki áritun til að ferðast til Íslands máttu vera á landinu þegar umsókn er lögð fram og er til meðferðar hjá Útlendingastofnun, svo lengi sem 90 daga áritunarfrelsi þitt varir. Fari dvöl þín á Schengen-svæðinu fram yfir 90 daga á síðastliðnum 180 dögum verður umsókn synjað nema ríkar sanngirnisástæður eigi við.

Athugaðu hvort þú þurfir vegabréfsáritun til að ferðast til Íslands

Aðeins hjúskaparmakar íslenskra ríkisborgara mega byrja að vinna um leið og umsókn um dvalarleyfi fyrir maka hefur verið lögð fram og greidd.

Hjúskaparmakar erlendra ríkisborgara og sambúðarmakar íslenskra ríkisborgara mega ekki byrja að vinna fyrr en dvalarleyfi hefur verið veitt.

Eftir að hjúskaparmaki íslensks ríkisborgara hefur fengið vinnu er mögulegt að sækja um kerfiskennitölu til Skattsins til að geta stofnað bankareikning.

• Umsóknin þarf að vera undirrituð bæði af umsækjanda og launagreiðanda.

• Umsækjandi þarf að koma með umsóknina ásamt vegabréfi/ferðaskilríki í afgreiðslu Skattsins.