Tryggingastofnun
Aldursviðbót ellilífeyris greidd í fyrsta sinn
26. febrúar 2026
Aldursviðbót ellilífeyris hefur verið greidd til þeirra sem eiga rétt á henni fyrir tímabilið janúar til febrúar 2026 og greiðsluáætlanir hafa verið uppfærðar. Um 1.400 einstaklingar eiga rétt á aldursviðbót ellilífeyris sem er nýjung sem tók gildi 1. janúar síðastliðinn.
Aldursviðbót ellilífeyris greiðist þeim sem áttu rétt á aldursviðbót örorkulífeyris við ellilífeyrisaldur og voru á aldrinum 18-43 ára við fyrsta örorkumat eða þegar skilyrði endurhæfingarlífeyris voru fyrst uppfyllt.
Bent er á að ef viðkomandi var eldri en 43 ára þegar skilyrði endurhæfingarlífeyris voru fyrst uppfyllt eða við fyrsta örorkumat er ekki réttur á aldursviðbót ellilífeyris.
Upphæðir
Aldursviðbót elliífeyris getur verið að hámarki 32.917 kr. hjá einstaklingum sem fengu sitt fyrsta örorkumat á aldrinum 18 – 24 ára. Fjárhæðin lækkar um 5% frá og með 25 ára aldri fram að 44 ára aldri.
Aldursviðbót er tekjutengd. Samanlögð fjárhæð lífeyris, heimilisuppbótar og aldursviðbótar lækkar um 45% af tekjum umfram frítekjumörk, þar til aldursviðbót fellur niður.
Aldursviðbót ellilífeyris var komið á með lögum nr. 95/2025.