Heimsóknirnar eru liður í að efla samstarf opinberra skjalasafna hér á landi. Í heimsóknunum gefst tækifæri til að styrkja tengsl á milli opinberra skjalasafna á sama tíma og sameiginleg mál eru rædd og ráðgjöf er veitt í hinum ýmsu málum.

Í heimsóknunum í síðustu viku var meðal annars rætt um viðtöku skjala afhendingarskyldra aðila í kjölfar sameininga sveitarfélaga, frágang og skráningu pappírsskjalasafna, vörslu rafrænna gagna, skráningu og söfnun einkaskjalasafna í héraði og varðveislu og miðlun ljósmynda.

Starfssvæði Héraðsskjalasafn Borgarfjarðar er Borgarbyggð og Hvalfjarðarsveit og eru þessi sveitarfélög jafnframt afhendingarskyld til safnsins. Starfssvæði Héraðsskjalasafns Austur-Húnavatnssýslu eru Húnabyggð og Sveitarfélagið Skagaströnd og eru þessi tvö sveitarfélög afhendingarskyld með sín skjöl á safnið.

Á Héraðsskjalasafni Borgarfjarðar var fundað með Þórnýju Hlynsdóttur héraðsskjalaverði, Elínu Sigurborgu Harðardóttur safnverði og Þórunni Kjartansdóttur forstöðumanni Safnahúss Borgarfjarðar. Á Héraðsskjalsafni Austur-Húnavatnssýslu var fundað með Maríönnu Þorgrímsdóttur starfsmanni skjalasafns og Katharinu Schneider forstöðumanni Héraðsbókasafns og Héraðsskjalasafns Austur-Húnavatnssýslu. Svala Runólfsdóttir, fyrrum héraðsskjalavörður, kíkti jafnframt í heimsókn og heilsaði upp á gestina.

Á myndinni að ofan má sjá Hrefnu Róbertsdóttur, Þórnýju Hlynsdóttur og Elín Sigurborg Harðardóttir.

Frá vinstri: Hrefna Róbertsdóttir, Maríanna Þorgrímsdóttir og Katharina Schneider.