Alls taka 40 sérfræðingar þátt í ráðstefnunni og er meirihluti þeirra frá Íslandi. Þátttakendur koma frá skjalasöfnum, safnastofnunum og rannsóknaumhverfi landanna og ræða sameiginleg verkefni og áskoranir á sviði varðveislu, aðgengis og miðlunar heimilda.

Á dagskrá eru fyrirlestrar, pallborðsumræður og vinnustofur þar sem fjallað er meðal annars um sjálfstæði skjalasafna og sameiginlegan skjalaarf á vestnorrænu löndunum, afhendingu á og varðveislu skjala, miðlun sameiginlegrar sögu landanna og áhrif stafrænnar þróunar og gervigreindar á skjalavörslu. Þá verður sérstök áhersla lögð á tengsl skjalasafna við samfélag, menningararf og sögulegt minni.

Meðal dagskrárliða var heimsókn á Þjóðskjalasafn Grænlands þar sem gestir fengu fræðslu frá þjóðskjalaverðinum Vivi Noahsen um þátttöku þjóðskjalasafnsins í rannsókn yfirvalda vegna lykkjumálsins svokallaða. Nýlega var gefin út skýrsla um „fjölskylduáætlanagerð“ danskra yfirvalda í Grænlandi en á áttunda áratug síðustu aldar voru settar getnaðarvarnarlykkjur í rúmlega 4.000 grænlenskar stúlkur og konur án þeirra vitundar. Erfitt reyndist að finna heimildir um þessar aðgerðir en starfsfólki þjóðskjalasafnsins tókst að rekja saman sjúkraskrár og aðrar skrár lækna og heilbrigðisstarfsfólks sem geymdar voru á ólíkum stöðum til þess að gera rannsakendum kleift að hafa uppi á konunum sem brotið var gegn.

Ráðstefnan er mikilvægur vettvangur fyrir samstarf vestnorrænna skjalasafna og stuðlar að aukinni þekkingarmiðlun milli landanna um varðveislu og nýtingu heimilda til framtíðar.