Gagnagrunnurinn í heild inniheldur fornbréf sem ná frá 14. öld og allt fram á fyrri hluta 18. aldar. Um er að ræða skjöl varðandi kaupmála, máldaga kirkna, ýmiss konar samninga, dóma, jarðakaup, landamerkjamál, rekamál og margt fleira. Um er að ræða þúsundir bréfa, sem hafa verið óaðgengileg þorra manna í upprunalegu formi fram að þessu. Hér má ekki aðeins finna skráningarfærslur yfir bréfin heldur eru birtar vandaðar stafrænar ljósmyndir af þeim sem öllum er frjálst að nota án endurgjalds og að auki hægt að leita að nöfnum einstaklinga og staðarnöfnum, sem koma fyrir í bréfinu.

Íris Stefánsdóttir tók ljósmyndir af þeim ríflega 700 skjölum sem varðveitt eru í Þjóðskjalasafni Íslands, Gísli Baldur Róbertsson skráði safnkostinn í gagnagrunninn og Unnar Rafn Ingvarsson stýrði verkefninu af hálfu Þjóðskjalasafns. Verkið var styrkt af A.P. Möller sjóðnum í Danmörku en myndarlegur styrkur sjóðsins gerði það mögulegt að vinna að þessu metnaðarfulla verkefni.

Í tilefni opnunarinnar mun Þórunn Sigurðardóttir, rannsóknarprófessor emeritus, flytja erindi um gerð gagnagrunnsins föstudaginn 13. nóvember kl. 16:00 í Eddu, húsi Árnastofnunar. Nánar má lesa um viðburðinn hér.

Laugardaginn 14. nóvember verður síðan haldið málþing þar sem fræðimenn fjalla um safnkostinn frá ýmsum sjónarhornum. Málþingið fer fram í Eddu frá kl. 14:00 til 17:30. Dagskrá málþingsins má nálgast hér.

Áhugasöm um sögu og samfélag ættu að kynna sér þessa dagskrá.