Markmið könnunarinnar er að kortleggja hve mikið rými er notað undir varðveislu pappírsskjala ásamt núverandi umfangi pappírsskjala sem er í varðveislu hjá aðilum sem eru afhendingarskyldir til Þjóðskjalasafns Íslands.

Framkvæmd könnunarinnar fer fram dagana 4. til 25. nóvember næstkomandi. Forstöðumönnum afhendingarskyldra aðila, sem ábyrgðaraðilar skjalastjórnar og skjalavörslu, verður sent bréf áður sem kynnir framkvæmd hennar.

Vakin er athygli á því að könnunin mun ná til afhendingarskyldra aðila ríkisins og sveitarstjórnarskrifstofa sem eru afhendingarskyldar til Þjóðskjalasafns Íslands.

Af þessu tilefni mun Þjóðskjalasafns Íslands halda kynningu á framkvæmd könnunarinnar og fer hún fram miðvikudaginn 28. október kl. 10 og verður haldin í gegnum Teams. Kynningin er liður í því að aðstoða afhendingarskylda aðila við að svara könnuninni og veita Þjóðskjalasafni sem bestar upplýsingar. Á kynningunni verður farið yfir hverju má búast við í könnuninni, framkvæmd hennar og eftirfylgni.

Kynningin er ætluð umsjónarfólki skjalasafna afhendingarskyldra aðila, hvort sem það eru skjalastjórar eða annað starfsfólk, forstöðumönnum eða öðrum sérfræðingum.

Hægt er að skrá sig á kynninguna sem fram fer 28. október hér.

Hér má nálgast skýrslu um skjalageymslur afhendingarskyldra
aðila ríkisins frá árinu 2021.