Samræðufélagar er námsefni ætlað nemendum sem þurfa stuðning við að læra íslensku. Efnið, sem er breskt að uppruna og hefur verið notað um árabil í þarlendum skólum með góðum árangri, hefur nú verið þýtt og staðfært á íslensku. Um er að ræða safn verkefna sem henta vel til að efla orðaforða, tjáningu og skilning barna á töluðu máli. Kennarar fara á tveggja daga námskeið til að læra um kennsluaðferðina og að kenna námsefnið. Fyrra námskeiðið var fyrir kennara nemenda á yngsta- og miðstigi (@primary) og það seinna fyrir kennara á unglingastigi grunnskóla og framhaldsskóla (@secondary). Á föstudeginum fyrir hádegi var síðan stutt námskeið fyrir kennara sem hafa kennt námsefnið fyrir yngri nemendur og vildu öðlast réttindi til að kenna námsefnið öðrum kennurum.

Kennari á fyrra námskeiðinu var Rannveig Sigurðardóttir, verkefnastjóri grunnskóla hjá Akureyrarbæ en þjálfaranámskeiðið, það síðara, kenndi Clare Reed, einn höfunda og eigandi Talking Partners námsefnisins.