Miðstöð menntunar og skólaþjónustu
Úrslit Ljóðaflóðs 2025
28. janúar 2026
Sorg, gleði, fjölbreytileiki, tungumál og náttúra voru á meðal yrkisefna í ljóðasamkeppninni Ljóðaflóði sem Miðstöð menntunar stóð fyrir í tilefni af degi íslenskrar tungu. Ljóðformið var einnig fjölbreytt en það bárust bæði bundin og óbundin ljóð, hækur og prósaljóð.
Grunnskólanemendur frá 25 skólum sendu samtals 301 ljóð í keppnina, 106 ljóð frá yngsta stigi, 86 frá miðstigi og 109 ljóð frá unglingastigi.
Dómnefnd valdi eitt verðlaunaljóð á hverju stigi og fengu vinningshafar bókaverðlaun og viðurkenningarskjal. Auk þess gefst nemendum tækifæri til að flytja verðlaunaljóð sín á KrakkaRúv.
Vinningshafarnir eru:
Þórdís Harpa Óskarsdóttir, nemandi í 2. bekk Foldaskóla í Reykjavík, fyrir ljóðið Ævintýri. Í umsögn dómnefndar segir: Frumlegt og skemmtilegt ljóð með ævintýrablæ. Síðasta ljóðlínan skapar hugrenningatengsl við fyrri ljóðlínur og rammar inn ljóðið á óvæntan hátt. Titillinn hæfir ljóðinu mjög vel.
Önnur ljóð sem voru á meðal þeirra bestu á yngsta stigi má sjá hér.
Alex Veigar Ásgeirsson, nemandi í 6. bekk Hofstaðaskóla í Garðabæ, fyrir ljóðið Handbolti. Í umsögn dómnefndar segir: Í ljóðinu er handbolta líkt við tungumál sem þarf að halda á lofti. Gott samspil er eins og samtal þar sem orð berast á milli fólks og ekki verra að enda það með góðu skoti sem hittir í mark, rétt eins og hnyttin ummæli. Samlíkingin er skemmtileg og notkun á rími sömuleiðis.
Önnur ljóð sem voru á meðal þeirra bestu á miðstigi má sjá hér.
Fanndís Lilja Lárusdóttir, nemandi í 10. bekk Hvolsskóla á Hvolsvelli, fyrir ljóðið Mamma. Í umsögn dómnefndar segir: Hjartnæmt og einlægt ljóð sem tjáir ást og kærleika en jafnframt söknuð og sorg. Bygging ljóðsins er vel heppnuð og lokaljóðlínur skapa áhrifarík hughrif.
Önnur ljóð sem voru á meðal þeirra bestu á unglingastigi má sjá hér.
Verðlaunaljóð í ljóðasamkeppni grunnskólanema, Ljóðaflóði 2025
Ævintýri
Stelpan fór að leita
að svönum í Á
en festist í Ö.
Þá sá hún svanina.
Þórdís Harpa Óskarsdóttir, verðlaunahafi á yngsta stigi
Handbolti
Ekki bara íþrótt
þar sem boltinn fer í mark.
Ekki bara hreyfing
með bolta eða hark.
Handbolti er tungumál
sem við tölum saman.
Sendum bolta á milli
og höfum af því gaman.
Boltinn eins og orð
sem berast milli manna.
Við þurfum bara að halda þeim á floti
og enda svo með góðu skoti.
Alex Veigar Ásgeirsson, verðlaunahafi á miðstigi
Mamma
Hún hnýtti mér blómakrans
og setti hann á höfuðið mitt
eins og kórónu.
Stjörnur dansa í augum hennar
og ástin skín af henni
eins og sólargeisli.
Ég myndi gefa henni himininn
og skýin ef ég gæti.
Ég sit í fangi hennar
og segi henni allt sem í hjarta mínu býr.
Nú ligg ég við gröf hennar í nýslegnu grasi
að hnýta blómakrans
sem hún mun aldrei sjá.
Fanndís Lilja Lárusdóttir, verðlaunahafi á unglingastigi
Við óskum vinningshöfum hjartanlega til hamingju með frábæran árangur og þökkum nemendum og kennurum fyrir þátttökuna. Við hlökkum til næsta Ljóðaflóðs og vonum að enn fleiri muni taka þátt næst en keppnin er haldin árlega í tengslum við dag íslenskrar tungu 16. nóvember.