Verðlaunin eru veitt árlega fyrir framúrskarandi skólastarf, kennslu, þróunarverkefni eða framlag til iðn- og verkmenntunar. Þau minna okkur á hversu mikilvæg störf kennara, skólastjórnenda og starfsfólks skóla eru og halda því um leið á lofti hvernig samstarf, fagmennska og hugmyndauðgi geta skapað djúpstæð áhrif í lífi barna og ungmenna. 

Verðlaunaafhending fer fram við hátíðlega athöfn á Bessastöðum í byrjun nóvember, þar sem einnig verða veitt sérstök hvatningarverðlaun. 

Tilnefningar 2025 Framúrskarandi skólastarf eða menntaumbætur 

• Leikskólinn Iðavöllur á Akureyri – fyrir fjölþætt og markvisst þróunarstarf þar sem ríkir lausnamiðað viðhorf og stöðug viðleitni til umbóta. 

• Víkurskóli í Reykjavík – fyrir skapandi og heildrænt þróunarstarf með áherslu á listir, nýsköpun og teymiskennslu þar sem nemendur vinna að fjölbreyttum þverfaglegum viðfangsefnum. 

• Skólahljómsveit Vesturbæjar og Miðbæjar – fyrir gróskumikið tónlistarstarf sem hefur vaxið og dafnað í samstarfi kennara, listafólks og nemenda og stuðlar að virkni og gleði barna í námi. 

Kennarar 

• Gunnar Ásgeir Sigurjónsson, framhaldsskólakennari á pípulagningabraut Tækniskólans – fyrir einstaka alúð við nemendur og fagmennsku í kennslu. 

• Hjördís Óladóttir, grunnskólakennari við Hrafnagilsskóla – fyrir skapandi og fjölbreytta kennsluhætti og hæfileika til að skapa örvandi námsumhverfi þar sem börn blómstra. 

• Ingibjörg Jónasdóttir, leikskólakennari við leikskólann Rauðhól – fyrir farsælt brautryðjendastarf í að efla áhuga barna á bókum og lestri. 

• Laufey Einarsdóttir, grunnskólakennari í Sæmundarskóla – fyrir faglega og árangursríka stærðfræðikennslu sem byggir á gleði, virkni og skýrleika. 

• Örvar Rafn Hlíðdal, íþróttakennari við Flóaskóla – fyrir framúrskarandi íþróttakennslu sem byggir á hvatningu, aga og samkennd. 

Þróunarverkefni 

• Gullin í grenndinni – samstarfsverkefni leikskólans Álfheima og Vallaskóla á Selfossi um nám úti í náttúrunni, sem hefur þróast í lifandi hluta skólastarfs beggja skóla. 

• Íslenskubrú Breiðholts – samstarfsverkefni grunnskólanna í Breiðholti sem miðar að því að efla íslenskukennslu barna með annað móðurmál en íslensku og byggja brú milli skóla, fjölskyldna og samfélags. 

• Lítil skref á leið til læsis – samstarfsverkefni leikskólans Grænuvalla og Borgarhólsskóla á Húsavík um málörvun og læsi, þar sem kennarar og fagfólk vinna saman að því að efla læsisgrunn yngstu barnanna. 

Iðn- og verkmenntun 

• Fataiðndeild Tækniskólans – fyrir metnaðarfulla og faglega kennslu sem byggir á einstaklingsmiðuðu námi og raunverulegum verkefnum. 

• Framhaldsskólinn í Vestmannaeyjum – fyrir nýstárlega nálgun í málm- og vélstjórnargreinum þar sem hefðbundið nám hefur verið umbreytt í verkefna- og atvinnutengt nám. 

• Unnar Þorsteinn Bjartmarsson, kennari við Grunnskóla Borgarfjarðar og Fjölbrautaskóla Vesturlands – fyrir að kveikja áhuga nemenda á öllum aldri á iðn- og verknámi og leggja grunn að framtíðarstarfsfólki í greininni. 

 Íslensku menntaverðlaunin eru samstarfsverkefni fjórtán aðila undir forystu forseta Íslands, og endurspegla sameiginlega sýn menntasamfélagsins á mikilvægi faglegs metnaðar og umbóta í skólastarfi. Frekari upplýsingar og greinargerðir tilnefninga má finna á vef Samtaka áhugafólks um skólaþróun.