Sögurnar voru valdar úr fjölmörgum innsendingum sem bárust í Sögur – smásagnasamkeppni sem haldin er á vegum sjö stofnana: Miðstöðvar menntunar og skólaþjónustu, KrakkaRÚV, Borgarbókasafnsins, Borgarleikhússins, Bókmenntaborgar UNESCO, Lista fyrir alla og Skóla- og frístundasviðs Reykjavíkurborgar.

Að vanda hlutu tveir höfundar verðlaunin Svaninn sem veitt eru fyrir sögur sem þykja skara fram úr á Sögum – verðlaunahátíð barnanna. Í ár hlaut Bríet Lovísa Þórðardóttir verðlaun fyrir söguna Jólakötturinn mótmælir í flokki 7–9 ára og Kría Kristjónsdóttir fyrir söguna Tannlæknaferðin í flokki 10–12 ára.

Með þátttöku í smásagnasamkeppni Sagna fá börn tækifæri til að komast að því hvort í þeim blundi rithöfundur. Þau sem senda inn efnilega sögu fá að vinna undir handleiðslu ritstjóra sem aðstoðar þau við að fínpússa textann fyrir útgáfu. Í ár sá rithöfundurinn Eva Þorgeirsdóttir um þá vinnu.

Búið er að opna fyrir innsendingar í næstu samkeppni. Áhugasöm börn, kennarar og forsjáraðilar eru hvattir til að nýta einstakt tækifæri fyrir unga og efnilega höfunda sem skrifa, skapa og gefa ímyndunaraflinu lausan tauminn.

Þetta er í áttunda sinn sem ritröðin Risastórar smásögur kemur út hjá Miðstöð menntunar og skólaþjónustu. Bókin er á rafrænu formi og aðgengileg á heimasíðu Miðstöðvar menntunar og skólaþjónustu og er aðgengileg hér.