Perlan hefur síðastliðið ár unnið að þrívíddarskönnun sýningarinnar Undur íslenskrar náttúru og þróun námsleiks sem gerir börnum um allt land kleift að upplifa náttúru Íslands á gagnvirkan og aðgengilegan hátt. Fyrsta útgáfa leiksins er nú tilbúin til prófana í grunn- og framhaldsskólum.

Starfshópur frá MMS og Perlunni mun vinna náið með áhugasömum kennurum og skólum sem taka þátt í þróun og prófunum á leiknum. Á sama tíma hefst vinna við öflugan gagnagrunn um íslenska náttúru sem mun nýtast við gerð kennsluefnis í náttúrufræði, meðal annars með stuðningi gervigreindar.

Markmið verkefnanna er skýrt: að gera náttúrufræði aðgengilega, lifandi og skemmtilega fyrir alla nemendur landsins og styðja kennara í að skapa fjölbreytt og áhugahvetjandi námstækifæri.