Lesfimipróf – endurbætur og fyrirlögn í nýju kerfi

Lesfimipróf og stuðningspróf þeirra verða hluti af Matsferli og munu allir skólar leggja þau fyrir í gegnum nýtt viðmót Matsferils frá og með 1. janúar 2026. Fyrirlögn í september verður hins vegar með sama sniði og áður, þ.e. prófin verða lögð fyrir nemendur í gegnum Skólagátt. Við minnum á mikilvægi þess að skólar uppfæri nemendalista sína í Skólagátt vegna fyrirlagnarinnar í september, en hægt verður að leggja lesfimiprófin fyrir þann 1. – 30. september, eins og venjulega.

Stöðu- og framvindupróf – prófagluggi í mars

Samræmd stöðu- og framvindupróf Matsferils í lesskilningi og stærðfræði verða lögð fyrir nemendur 4. – 10. bekkjar allra grunnskóla landsins, en boðið verður upp á opinn prófaglugga frá 2. – 27. mars 2026. Skólum er skylt að leggja prófin fyrir nemendur í 4., 6. og 9. bekk. Ákvörðun um notkun prófanna í öðrum árgöngum er í höndum kennara, skólastjóra eða fræðsluyfirvalda hvers sveitarfélags. Fyrirhugaðir eru rafrænir fundir með skólastjórum allra grunnskóla landsins þann 15. og 17. september þar sem farið verður nánar yfir skipulag og tímalínu innleiðingar prófanna.

Fundarboð hefur þegar verið sent út frá Skólastjórafélagi Íslands.