Verkefnið byggir á hugmyndabanka með fjölbreyttu efni sem nýtist í frístundastarfi og er skipulagt eftir sjö ólíkum læsistegundum sem frístundaheimili vinna hvað mest með.

Í hugmyndabankanum er að finna fjölbreytt úrval verkefna sem auðvelt er að aðlaga að mismunandi aðstæðum í starfi frístundaheimila. Það sem gerir hann einstakan er að margar hugmyndanna byggja á raunverulegum verkefnum sem frístundaheimili hafa þróað og prófað í sínu starfi. Efnið er aðgengilegt öllum á vefsíðu Frístundalæsis, sem er reglulega uppfærð með nýjum hugmyndum og verkefnum.

Árið 2023 var Lærdómssamfélag Frístundalæsis stofnað og hefur síðan þá skapað nýjar leiðir til miðlunar, samvinnu og náms í frístundaheimilum. Lærdómssamfélagið er vettvangur fyrir stjórnendur frístundaheimila sem vilja dýpka þekkingu sína, læra af öðrum og efla frístundastarf með mál- og læsiseflingu í forgrunni.

Lærdómssamfélagið var upphaflega ætlað stjórnendum frístundaheimila í Reykjavíkurborg en er nú opið á landsvísu í samstarfi við þróunarverkefnið Menntun-Móttaka-Menning (MEMM). Í dag taka stjórnendur frá 14 sveitarfélögum þátt, sem er mikilvægt skref í að gera mál- og læsiseflingu að sameiginlegu verkefni frístundaheimila á landsvísu..