Á meðgöngu er blóðflokkur barnshafandi konu kannaður og leitað að mótefnum í blóði hennar. Ef konan er Rhesus D-neikvæð en barnið Rhesus D-jákvætt getur myndast blóðflokkamisræmi sem í sumum tilvikum getur haft áhrif á heilsu barnsins.

Með blóðrannsóknum og fyrirbyggjandi meðferð er hægt að draga úr hættu á fylgikvillum.

Hvað er Rhesus D-blóðflokkamisræmi?

Rhesus D er eiginleiki á yfirborði rauðra blóðkorna. Fólk er annaðhvort Rhesus D-jákvætt eða Rhesus D-neikvætt.

Ef barnshafandi kona er Rhesus D-neikvæð og barnið Rhesus D-jákvætt getur ónæmiskerfi konunnar myndað mótefni gegn rauðum blóðkornum barnsins. Þetta kallast Rhesus D-næming.

Mótefnin geta haft áhrif á barnið, einkum á síðari meðgöngum. Þess vegna er mikilvægt að greina mögulegt blóðflokkamisræmi og koma í veg fyrir næmingu.

Hvernig er fylgst með Rhesus D á meðgöngu?

Í upphafi meðgöngu

• Blóðflokkur er ákvarðaður og leitað að rauðkornamótefnum hjá öllum barnshafandi konum.

Við 25 vikur

• Hjá Rhesus D-neikvæðum konum er leitað að rauðkornamótefnum og Rhesus D-blóðflokkur barnsins greindur með blóðrannsókn hjá móður.

Við 28 vikur

• Rhesus D-neikvæðum konum sem ganga með Rhesus D-jákvætt barn er boðin mótefnasprauta (anti-D) til að koma í veg fyrir næmingu. Ef barnið er Rhesus D-neikvætt er ekki þörf á sprautunni.

Eftir fæðingu

• Blóðflokkur barnsins er staðfestur með blóðsýni úr naflastreng. Ef móðirin er Rhesus D-neikvæð og barnið Rhesus D-jákvætt fær móðirin aðra anti-D-sprautu, að því gefnu að hún hafi ekki þegar myndað anti-D-mótefni.

Hvað gerir mótefnasprautan?

Mótefnasprautan inniheldur anti-D-mótefni sem draga úr líkum á að ónæmiskerfi móðurinnar myndi eigin mótefni gegn Rhesus D-jákvæðum rauðum blóðkornum.

Meðferðin er fyrirbyggjandi og er ætlað að vernda bæði núverandi og síðari meðgöngur.