Almenn þjóðaratkvæðagreiðsla á að fara fram í fyrsta lagi þremur mánuðum og í síðasta lagi einu ári eftir að þingsályktunartillaga þess efnis hefur verið samþykkt á Alþingi.

Ef þjóðaratkvæðagreiðsla er tilkomin vegna kröfu Alþingis um að forseti verði leystur frá störfum eða ef forseti synjar lagafrumvarpi staðfestingar þá skal hún  fara fram innan tveggja mánaða.

Þjóðaratkvæðagreiðsla skal einnig fara fram innan tveggja mánaða ef um er að ræða breytingar á kirkjuskipan ríkisins.

Landskjörstjórn ákveður kjördag þjóðaratkvæðagreiðslu synji forseti lagafrumvarpi staðfestingar. Þegar það gerist fær lagafrumvarpið þó engu að síður lagagildi. Það skal leggja það svo fljótt sem kostur er undir atkvæði allra kosningarbærra manna í landinu til samþykktar eða synjunar með leynilegri atkvæðagreiðslu.

Þegar ákveðið málefni er lagt fyrir þjóðaratkvæði auglýsir landskjörstjórn þjóðaratkvæðagreiðslu á sem heppilegustum tíma en í síðasta lagi einum mánuði fyrir atkvæðagreiðsluna. Þá skal einnig birta spurninguna sem lögð verður fyrir kjósendur.

Landskjörstjórn ákveður orðalag og framsetningu spurningar á kjörseðli í atkvæðagreiðslu vegna kröfu Alþingis um að forseti verði leystur af störfum, ef forseti synjar lagafrumvarpi staðfestingar og um breytingar á kirkjuskipan ríkisins.

Allir íslenskir ríkisborgarar sem hafa náð 18 ára aldri þegar kosning fer fram og eiga lögheimili á Íslandi.

Íslendingar 18 ára og eldri sem eiga lögheimili erlendis hafa kosningarrétt í sextán ár frá því að flutt var frá Íslandi ef þeir hafa einhverntíman átt lögheimili á Íslandi. Eftir þann tíma þarf að sækja um til Þjóðskrár Íslands um að vera tekinn á kjörskrá. Ákvörðun um töku á kjörskrá gildir í fjögur ár frá 1. desember næstum eftir að umsókn var lögð fram. 

Kjördæmi er landfræðileg afmörkun á því svæði þar sem kjósandi kýs. Kjördæmi við þjóðaratkvæðagreiðslur eru hin sömu og við alþingiskosningar og eru sex talsins. Afmörkun þeirra ræðst af mörkum einstakra sveitarfélaga en Reykjavík skiptist í tvö kjördæmi. Kjördæmin eru:

• Norðvesturkjördæmi

• Norðausturkjördæmi

• Suðurkjördæmi

• Suðvesturkjördæmi

• Reykjavíkurkjördæmi norður

• Reykjavíkurkjördæmi suður

Ólíkt öðrum kosningum þar sem kjósendur kjósa milli framboða og frambjóðenda, greiða kjósendur svarkostum atkvæði við þjóðaratkvæðagreiðslu.

Landskjörstjórn skal standa fyrir víðtækri kynningu á því málefni sem borið er undir þjóðaratkvæði. Landskjörstjórn setur nánari reglur um fyrirkomulag kynningar.

Þjóðaratkvæðagreiðsla vegna synjunar forseta á staðfestingu lagafrumvarps skal landskjörstjórn auglýsa eins fljótt og kostur er. Eigi síðar en viku fyrir atkvæðagreiðsluna skal landskjörstjórn auglýsa með tryggilegum hætti lög þau sem forseti synjaði staðfestingar svo að kjósendur geti kynnt sér efni þeirra. Frumvarpið til laganna og öll skjöl varðandi meðferð þess skulu vera aðgengileg á áberandi stað á vef landskjörstjórnar.