Fjárhagshluti Orra heldur utan um bókhald og fjárreiður ríkisins.

Hann veitir yfirsýn yfir tekjur, gjöld, eignir og skuldir og styður við uppgjör og gerð reikningsskila.

Kerfið tryggir að unnið sé með samræmd gögn þvert á stofnanir og að allar fjárhagsupplýsingar séu rekjanlegar og áreiðanlegar. Með því styrkir það fjármálastjórnun og eftirlit í ríkisrekstri.

Helstu kerfishlutar

Fjárhagshluti Orra samanstendur af tengdum einingum sem vinna saman:

• Höfuðbók (General Ledger)

  • Heldur utan um allar bókhaldsfærslur og safnar gögnum úr öðrum einingum. Höfuðbók er grunnur að fjárhagsyfirlitum og uppgjöri.

• Viðskiptaskuldir (Accounts Payable)

  • Tekur á móti og vinnur reikninga frá birgjum. Styður við rafræn samþykktarferli og greiðslur.

• Viðskiptakröfur (Accounts Receivable)

  • Heldur utan um kröfur og tekjur. Styður við útgáfu reikninga og innheimtu.

• Lausafjárstýring (Cash Management)

  • Veitir yfirsýn yfir stöðu bankareikninga og sjóðstreymi. Styður við afstemmingu og greiðsluflæði.

• Eignaskrá (Fixed Assets)

  • Heldur utan um fastafjármuni ríkisins. Reiknar afskriftir og styður reikningsskil.

Mannauðs- og launakerfi í Orra halda utan um upplýsingar um starfsfólk ríkisins og styðja við launavinnslu. Í kerfinu eru skráðar allar helstu forsendur sem þarf til að reikna og greiða laun, svo sem starfshlutfall, launakjör, ráðningar og aðrar viðeigandi upplýsingar.

Laun starfsfólks hjá stofnunum í A‑hluta ríkissjóðs eru greidd í Orra.

Kerfið er einnig notað af hluta stofnana í B‑ og C‑hluta.

Verkbókhald heldur utan um kostnað og tekjur verkefna og veitir skýra yfirsýn yfir stöðu þeirra. Kerfið safnar gögnum úr launum, innkaupum og bókhaldi og skráir þau á verkefni.

Byggir á Project Accounting í Oracle E‑Business Suite.

Innkaupakerfi Orra heldur utan um allt innkaupaferlið frá pöntun til greiðslu. Það styður við gerð beiðna og pantana, móttöku vöru og þjónustu og samþykkt reikninga.

Byggir á innkaupahluta Oracle E‑Business Suite (Procurement).

Aðgangi notenda að Orra er stýrt með skipulögðum hætti sem tryggir öryggi og rekjanleika. Hver notandi hefur persónubundinn aðgang sem byggir á hlutverki hans í starfi.

Aðgangur er veittur í gegnum svokölluð ábyrgðarsvið sem skilgreina hvaða kerfishluta notandi hefur aðgang að og hvaða gögn hann sér. Þannig hefur hver notandi aðeins aðgang að þeim upplýsingum og aðgerðum sem hann þarf til að sinna sínu starfi.

Kerfið styður aðgreiningu starfa. Það þýðir að ábyrgð er skipt milli aðila, til dæmis þannig að sá sem bókar reikning getur hvorki samþykkt hann né greitt. Þetta dregur úr hættu á mistökum og misferli.

Aðgangur er veittur og uppfærður samkvæmt formlegum ferlum. Hann er endurskoðaður reglulega og felldur niður þegar starfshlutverk breytist eða við starfslok.

Einungis viðurkenndir ábyrgðaraðilar geta óskað eftir aðgangi. Forstöðumaður stofnunar eða mannauðsstjóri sækir um aðgang að mannauðskerfi, en forstöðumaður eða fjármála- / rekstrarstjóri sækir um aðgang að fjárhagskerfum. Með þessu er tryggt að aðgangsveitingar séu í samræmi við ábyrgð og hlutverk innan stofnana.

Í stuttu máli tryggir aðgangsstýring í Orra að réttir aðilar hafi réttar heimildir á hverjum tíma og að meðferð upplýsinga sé örugg og í samræmi við reglur.