Fjarskiptainnviðasvið ber ábyrgð á skipulagi fjarskiptaauðlinda, svo sem tíðna og númera, og úthlutun heimilda fyrir nýtingu þeirra.

Sviðið sinnir einnig eftirliti með ljósvakanum, þar á meðal með mælingum og úrvinnslu truflana, og bregst við þegar þörf er á.

Með kortlagningu og greiningu á núverandi og áætluðum fjarskiptainnviðum, og tengdum innviðum, styður sviðið við uppbyggingu innviða í samstarfi við stjórnvöld og markaðsaðila.

Netöryggissvið Fjarskiptastofu sinnir áhættumiðuðu og fyrirbyggjandi eftirliti með net- og upplýsingaöryggi hjá skilgreindum mikilvægum innviðum á sviði fjarskipta, veitendum stafrænnar þjónustu og stafrænum grunnvirkjum.

Sviðið framkvæmir einnig almenn og sértæk áhættumöt á sviði netöryggis, metur hæfni aðila, prófar netvarnir, greinir atvik og gefur fyrirmæli um nauðsynlegar úrbætur.

Þá leiðir sviðið samstarf eftirlitsstjórnvalda á sviði netöryggis, tekur þátt í evrópsku samstarfi um stefnumótun og í nefndarstarfi NATO sem snýr að áfallaþoli fjarskiptaþjónustu og -neta.

Auk verkefna á sviði netöryggis sinnir sviðið eftirliti með traustþjónustum og er samhæfingaraðili Eyvarar, hæfnisseturs Íslands á sviði netöryggis.

Rekstrarsvið Fjarskiptastofu tryggir samfelldan og skilvirkan rekstur sem og að hann sé samkvæmt vottuðum gæðaferlum stofnunarinnar.

Stjórnsýslusvið Fjarskiptastofu samræmir stjórnsýslumál stofnunarinnar og leiðir samkeppnis- og neytendamál á sviði fjarskipta.

Innan sviðsins eru unnar markaðsgreiningar og lagðar kvaðir á markaðsaðila sem hafa umtalsverða markaðshlutdeild.

Upplýsingatæknisvið Fjarskiptastofu annast upplýsingatækniumhverfi stofnunarinnar og ber ábyrgð á því að upplýsingatæknilausnir styðji við þarfir allra sviða hverju sinni.

Sviðið leiðir stefnumótun og þróun í upplýsingatæknimálum í samstarfi við önnur svið, sér um skilvirka innleiðingu upplýsingatæknikerfa og breytingar á þeim, og leiðir tæknileg viðbrögð við öryggisatvikum í upplýsingakerfum stofnunarinnar.

Öll kerfi Fjarskiptastofu falla undir upplýsingatækniumhverfi sviðsins.