Fiskistofa hefur lokið úthlutun makríls samkvæmt reglugerð um 10. breytingu á reglugerð um leyfilegan heildarafla og veiðar í atvinnuskyni fiskveiðiárið 2025/2026 og almanaksárið 2026, auk reglugerðar um veiðar íslenskra skipa á makríl.

Töluverðar breytingar hafa orðið á úthlutun makríls vegna aukinna heimilda íslenskra skipa til veiða í norskri og færeyskri lögsögu.

Úthlutun eftir veiðisvæðum

Aflamarki hefur verið úthlutað á þremur veiðisvæðum í samræmi við aflahlutdeildir skipa:

Skip geta nýtt heimildir í norskri og færeyskri lögsögu innan íslenskrar og alþjóðlegrar lögsögu. Ekki er hins vegar heimilt að nýta heimildir af öðrum svæðum til veiða í norskri eða færeyskri lögsögu.

Veiðar í norskri lögsögu

Tvö atriði eru sérstaklega mikilvæg varðandi veiðar í norskri lögsögu:

• Þann 10. september 2026 mun Fiskistofa opna fyrir veiðar á 12.433 tonnum til viðbótar í norskri lögsögu.

• Þegar heildarafli íslenskra skipa í norskri lögsögu nær 6.405 tonnum verður öllum skipum skylt að bjóða allan afla sem veiddur er í norskri lögsögu í gegnum Norges Sildesalgslag SA.

Flutningur aflaheimilda

Heimilt er að millifæra þessar heimildir milli skipa með þeim takmörkunum sem gilt hafa um millifærslur milli A- og B-flokks skipa.

Skipum er einnig heimilt að flytja allt að 15% af óveiddum aflaheimildum yfir á næsta fiskveiðiár. Óveiddar heimildir í norskri og færeyskri lögsögu verður þó aðeins heimilt að veiða á næsta ári í íslenskri og alþjóðlegri lögsögu.

Jafnframt er heimilt að veiða allt að 5% umfram úthlutað aflamark. Sú heimild gildir þó ekki um aflaheimildir í norskri og færeyskri lögsögu. Veiði umfram úthlutað aflamark getur því eingöngu átt sér stað í íslenskri og alþjóðlegri lögsögu.

Makrílpottur fyrir B-flokks skip

Fiskistofa hefur opnað fyrir umsóknir um úthlutun úr makrílpotti samkvæmt reglugerð.

Í pottinum eru 500 tonn af makríl sem heimilt er að veiða í íslenskri og alþjóðlegri lögsögu.

Hverjir geta fengið úthlutun?

Aðeins B-flokks skip sem:

• hafa fengið úthlutað 30 tonnum eða minna, eða

• hafa þegar veitt 75% eða meira af úthlutun sinni

geta fengið viðbótarúthlutun úr pottinum.

Skilmálar úthlutunar

• Hámarksúthlutun til hvers skips í hverri úthlutun er 50 tonn.

• Gjald fyrir úthlutun er 26,17 krónur á hvert kíló.

• Á fyrsta virka degi hverrar viku afgreiðir Fiskistofa umsóknir sem bárust vikuna á undan.

• Heimildir sem keyptar eru úr pottinum eru óframseljanlegar.

Sækja um

Senda á umsóknir á netfangið: fiskistofa@fiskistofa.is.