Ríkisborgararéttur fyrir börn íslenskra ríkisborgara

Hlusta

Reglurnar sem ráða því hver á rétt á íslensku ríkisfangi frá fæðingu hafa oft breyst í gegnum árin. Í grunninn gildir sú regla að barn sem fæðist íslenskum foreldrum öðlast sjálfkrafa íslenskan ríkisborgararétt við fæðingu.

Þjóðskrá Íslands skráir íslenskt ríkisfang þess sem við fæðingu á sjálfkrafa rétt á íslensku ríkisfangi. Viðkomandi einstaklingur þarf meðal annars að leggja fram fæðingarvottorð hjá Þjóðskrá.

Rétturinn til íslensks ríkisfangs frá fæðingu byggir á því að íslenskt foreldri hafi sjálft haft íslenskt ríkisfang við fæðingu barns síns. Ísland heimilaði tvöfalt ríkisfang hinn 1. júlí 2003 en fyrir þann tíma misstu íslenskir ríkisborgarar íslenskt ríkisfang sitt þegar þeir sóttu um erlent ríkisfang. Ef foreldri hefur misst íslenskt ríkisfang fyrir fæðingu barns, þá á barn þess ekki lengur sjálfkrafa rétt á íslensku ríkisfangi, nema íslenska foreldrið sæki um endurveitingu íslensks ríkisfangs.

Barn sem fæðist einu íslensku og einu erlendu foreldri

Ef barn fæðist einu íslensku og einu erlendu foreldri þá eru það lögin sem voru í gildi við fæðingu barnsins sem skera úr um hvort það eigi eða hafi átt rétt á íslenskum ríkisborgararétti frá fæðingu. Máli skiptir hvenær barnið fæddist, hvort faðir eða móðir er íslenskur ríkisborgari, hver hjúskaparstaða foreldranna er og var við fæðingu barnsins sem og hvort barnið fæddist á Íslandi eða erlendis.

Börn fædd eftir 1. júlí 2018

Barn fætt eftir 1. júlí 2018 öðlast sjálfkrafa íslenskan ríkisborgararétt við fæðingu, ef annað foreldri þess er íslenskur ríkisborgari.

Þjóðskrá Íslands sér um skráningu barna sem öðlast sjálfkrafa íslenskt ríkisfang, sjá leiðbeiningar Þjóðskrár.

Börn fædd fyrir 1. júlí 2018

Íslensk móðir og erlendur faðir

Barn sem fæddist hérlendis eða erlendis, utan hjúskapar íslenskrar móður og erlends föður, öðlast sjálfkrafa íslenskan ríkisborgararétt ef þau eru enn ógift.

Þjóðskrá Íslands sér um skráningu barna sem öðlast sjálfkrafa íslenskt ríkisfang, sjá leiðbeiningar Þjóðskrár.

Gæta þarf að því að viðkomandi hafi ekki misst ríkisfangið við 22 ára aldur, sjá nánar hér.

Fæðing eftir 1. júlí 1982

Barn sem fæddist hérlendis eða erlendis 1. júlí 1982 eða síðar, í hjúskap íslenskrar móður og erlends föður, öðlast sjálfkrafa íslenskan ríkisborgararétt við fæðingu.

Þjóðskrá Íslands sér um skráningu barna sem öðlast sjálfkrafa íslenskt ríkisfang, sjá leiðbeiningar Þjóðskrár.

Gæta þarf að því að viðkomandi hafi ekki misst ríkisfangið við 22 ára aldur, sjá nánar hér.

Fæðing frá 1. júlí 1964 til 30. júní 1982

Barn sem fæddist hérlendis eða erlendis á tímabilinu 1. júlí 1964 til 30. júní 1982, í hjúskap íslenskrar móður og erlends föður, öðlast ekki sjálfkrafa íslenskan ríkisborgararétt við fæðingu.

Í vissum tilvikum getur viðkomandi sótt um leiðréttingu á því að hafa ekki öðlast íslenskt ríkisfang sjálfkrafa við fæðingu.

Séu skilyrði leiðréttingar ekki uppfyllt getur viðkomandi sótt um íslenskan ríkisborgararétt með almennri umsókn en þá er skilyrði að viðkomandi hafi átt lögheimili á Íslandi í tvö ár og að foreldri sé enn íslenskur ríkisborgari.

Fæðing fyrir 1. júlí 1964

Barn sem fæddist hérlendis eða erlendis fyrir 1. júlí 1964, í hjúskap íslenskrar móður og erlends föður, öðlast ekki sjálfkrafa íslenskan ríkisborgararétt við fæðingu.

Það getur sótt um íslenskan ríkisborgararétt með almennri umsókn en þá er skilyrði að viðkomandi hafi átt lögheimili á Íslandi í tvö ár og að foreldri sé enn íslenskur ríkisborgari.

Íslenskur faðir og erlend móðir

Barn sem fæddist hérlendis eða erlendis, í hjúskap íslensks föður og erlendrar móður, öðlast sjálfkrafa íslenskan ríkisborgararétt þegar feðrun hefur átt sér stað.

Þjóðskrá Íslands sér um skráningu barna sem öðlast sjálfkrafa íslenskt ríkisfang, sjá leiðbeiningar Þjóðskrár.

Gæta þarf að því að viðkomandi hafi ekki misst ríkisfangið við 22 ára aldur, sjá nánar hér.

Barn fætt á Íslandi

Barn sem fæddist hérlendis, utan hjúskapar íslensks föður og erlendrar móður, öðlast sjálfkrafa íslenskan ríkisborgararétt frá og með hjúskapardegi foreldranna ef þau gengu í hjónaband eftir fæðingu þess.

Þjóðskrá Íslands sér um skráningu barna sem öðlast sjálfkrafa íslenskt ríkisfang, sjá leiðbeiningar Þjóðskrár.

Gæta þarf að því að viðkomandi hafi ekki misst ríkisfangið við 22 ára aldur, sjá nánar hér.

Barn fætt erlendis

Fæðing fyrir 1. október 1998 eða eftir 17. apríl 2007

Barn sem fæddist erlendis fyrir 1. október 1998 eða eftir 17. apríl 2007, utan hjúskapar íslensks föður og erlendrar móður, öðlast sjálfkrafa íslenskan ríkisborgararétt frá og með hjúskapardegi foreldranna ef þau gengu í hjónaband eftir fæðingu þess. Skilyrði er að barnið hafi verið yngra en 18 ára og ógift þegar foreldrarnir gengu í hjónaband.

Þjóðskrá Íslands sér um skráningu barna sem öðlast sjálfkrafa íslenskt ríkisfang, sjá leiðbeiningar Þjóðskrár.

Gæta þarf að því að viðkomandi hafi ekki misst ríkisfangið við 22 ára aldur, sjá nánar hér.

Fæðing frá 1. október 1998 til 17. apríl 2007

Barn sem fæddist erlendis milli 1. október 1998 og 17. apríl 2007, utan hjúskapar íslensks föður og erlendrar móður, öðlast ekki sjálfkrafa íslenskan ríkisborgararétt þótt foreldrar þess hafi gengið í hjónaband síðar.

Faðir sem er íslenskur ríkisborgari, getur óskað eftir því að barn hans fái íslenskan ríkisborgararétt með tilkynningu sé það ekki orðið 18 ára.

Ef viðkomandi er orðinn 18 ára getur hann sótt um íslenskan ríkisborgararétt með almennri umsókn en þá er skilyrði að viðkomandi hafi átt lögheimili á Íslandi í tvö ár og að foreldri sé enn íslenskur ríkisborgari.

Barn fætt á Íslandi

Fæðing eftir 1. október 1998

Barn sem fæddist hérlendis eftir 1. október 1998, utan hjúskapar íslensks föður og erlendrar móður, öðlast sjálfkrafa íslenskan ríkisborgararétt við feðrun.

Þjóðskrá Íslands sér um skráningu barna sem öðlast sjálfkrafa íslenskt ríkisfang, sjá leiðbeiningar Þjóðskrár.

Gæta þarf að því að viðkomandi hafi ekki misst ríkisfangið við 22 ára aldur, sjá nánar hér.

Fæðing fyrir 1. október 1998

Barn sem fæddist hérlendis fyrir 1. október 1998, utan hjúskapar íslensks föður og erlendrar móður, öðlast ekki sjálfkrafa íslenskan ríkisborgararétt við fæðingu.

Viðkomandi getur sótt um íslenskan ríkisborgararétt með almennri umsókn en þá er skilyrði að viðkomandi hafi átt lögheimili á Íslandi í tvö ár og að foreldri sé enn íslenskur ríkisborgari.

Barn fætt erlendis

Fæðing frá 1. október 1998 til 1. júlí 2018

Barn sem fæddist erlendis milli 1. október 1998 og 1. júlí 2018, utan hjúskapar íslensks föður og erlendrar móður, öðlast ekki sjálfkrafa íslenskan ríkisborgararétt við fæðingu.

Faðir sem er íslenskur ríkisborgari, getur óskað eftir því að barn hans fái íslenskan ríkisborgararétt með tilkynningu sé það ekki orðið 18 ára.

Fæðing fyrir 1. október 1998

Barn sem fæddist erlendis fyrir 1. október 1998, utan hjúskapar íslensks föður og erlendrar móður, öðlast ekki sjálfkrafa íslenskan ríkisborgararétt við fæðingu.

Barn foreldris sem varð íslenskur ríkisborgari eftir fæðingu þess

Einstaklingur sem á foreldri sem varð íslenskur ríkisborgari eftir að viðkomandi fæddist getur sótt um íslenskan ríkisborgararétt með almennri umsókn. Skilyrði er að viðkomandi hafi átt lögheimili á Íslandi síðastliðin tvö ár og að foreldrið hafi verið íslenskur ríkisborgari í að lágmarki fimm ár.

Íslenskir ríkisborgarar fæddir erlendis

Hafa þarf í huga að íslenskir ríkisborgarar, sem fæddir eru erlendis og hafa aldrei átt lögheimili á Íslandi né búið eða dvalið hér á landi, geta misst ríkisfangið við 22 ára aldur. Hægt er að óska eftir staðfestingu á því að halda íslenska ríkisfanginu með því að leggja fram umsókn hjá Útlendingastofnun.

Þjónustuaðili

Útlendingastofnun