Foreldrar sem eru í námi geta átt rétt á fæðingarstyrk, í 6 mánuði fyrir hvort foreldri.
Heildarréttur tveggja foreldra er 12 mánuðir. 6 vikur eru framseljanlegar.
Báðir foreldrar geta hafið töku fæðingarstyrks frá 1. degi þess mánaðar sem barn fæðist í eða síðar.
Í tilviki frumættleiðingar eða varanlegs fósturs geta báðir foreldrar hafið töku fæðingarstyrks frá 1. degi þess mánaðar þegar barn kemur inn á heimili.
Ef um reynslutíma er að ræða áður en til frumættleiðingar eða varanlegs fósturs getur komið eða ef sækja þarf barnið til annarra landa er heimilt að hefja töku fæðingarstyrks við þann tíma enda hafi barnaverndarnefnd eða viðkomandi yfirvöld staðfest ráðstöfunina.
Réttur til fæðingarstyrks fellur niður 24 mánuðum eftir að barnið kom inn á heimilið.
Skilyrði
Foreldrar þurfa að hafa verið í fullu námi í að minnsta kosti 6 mánuði á síðustu tólf mánuðum fyrir fæðingu barns, frumættleiðingu eða töku barns í varanlegt fóstur, til að eiga mögulega rétt á fæðingarstyrk.
Foreldrar verða að hafa staðist kröfur um námsframvindu á þeim tíma.
Það er nauðsynlegt að vera með lögheimili á Íslandi.
Undanþágur frá skilyrði um lögheimili
Ef foreldri flutti lögheimili sitt tímabundið vegna náms erlendis.
Ef foreldri flutti lögheimili sitt tímabundið og stundar fjarnám við íslenskan skóla á þeim tíma.
Skilyrði:
Að hafa átt lögheimili hér á landi samfellt í 5 ár fyrir flutning, að minnsta kosti.
Ef foreldri var búsett í öðru aðildarríki að EES-samningnum á 12 mánaða tímabili fyrir fæðingu barns.
Skilyrði:
Að hafa átt lögheimili á Íslandi þegar barn fæðist, er frumættleitt eða tekið í varanlegt fóstur.
Það sé ekki liðið meira en mánuður frá því að tryggingatímabili lauk í því ríki.
Í þessum tilvikum skal foreldri láta S-041 vottorð fylgja með umsókn sinni sem staðfestir búsetu og tryggingatímabil í öðru aðildarríki að EES-samningnum.
Foreldrar sem hafa fengið dvalarleyfi hér á landi* í fyrsta skipti geta átt rétt á fæðingarstyrk.
Þá getur verið til staðar réttur jafnvel þó að foreldri hafi ekki átt lögheimili á Íslandi síðustu tólf mánuði fyrir fæðingu barns, frumættleiðingu eða töku barns í varanlegt fóstur.
Skilyrði:
Að það séu ekki liðnir tólf mánuðir frá veitingu dvalarleyfis.
*á grundvelli alþjóðlegrar verndar eða á grundvelli mannúðarsjónarmiða.
Upphæð
Með reiknvélinni er hægt að sjá mögulegar upphæðir fæðingarstyrks.
222.494 krónur er mánaðarlegur styrkur til foreldris í fullu námi.
Fæðingarstyrkur er föst upphæð.
Tekin er staðgreiðsla af styrknum.
Þessi upphæð á við um styrki vegna barna sem eru fædd á árinu 2024.
Sækja um
Sótt er um í það minnsta 3 vikum fyrir áætlaðan fæðingardag barns, frumættleiðingu eða töku barns í varanlegt fóstur.
Það tekur venjulega 2-4 vikur að afgreiða umsókn. Ef fylgigögn vantar getur afgreiðslutíminn lengst.
Staða umsóknar
Ef enginn tölvupóstur berst umsækjanda er enn verið að afgreiða umsóknina. Ef frekari upplýsingar vantar fær foreldri sendan póst um það.
Vinnslu lokið
Réttindabréf. Foreldri fær sent bréf í tölvupósti þegar vinnslu umsóknar er lokið. Í bréfinu eru niðurstöður útreiknings um rétt til fæðingarstyrks.
Greiðsluáætlun. Þegar barn hefur fæðst fær umsækjandi greiðsluáætlun í tölvupósti. Þar koma fram upphæðir sem greiddar verða í hverjum mánuði.
Greitt er eftir á fyrir undanfarandi mánuð.
Dæmi: Foreldri sem hefur fæðingarstyrk 1. janúar fær greitt síðasta virka dag þess mánaðar.
Aðrar greiðslur sem foreldri fær á sama tíma og fæðingarstyrk geta haft áhrif á greiðslur úr Fæðingarorlofssjóði.
Annars getur foreldri fengið of háar greiðslur í fæðingarorlofi sem þarf að greiða til baka með 15% álagi.
Launaseðlar
Launaseðlar eru í heimabanka undir rafrænum skjölum. Yfirleitt birtast launaseðlar í heimabanka 2 dögum fyrir greiðslu.
Það er hægt að breyta tímabili sem var búið að skrá og skrá nýtt tímabil fæðingarstyrks á netinu.
Það er gert í sömu umsókn og var send til að sækja um fæðingarstyrk. Umsóknin er á Mínum síðum á Ísland.is, undir Umsóknir. Það á ekki að búa til nýja umsókn.
Lesa meira: Tímabil fæðingarstyrks
Tímabil fæðingarstyrks
Hægt er að hefja töku styrks fyrsta dag mánaðar sem barn fæðist í.
Það má skipta greiðslutímabili fæðingarstyrks á fleiri en eitt tímabil en hvert tímabil má ekki vera styttra en 2 vikur.
Ef foreldri hefur verið í vinnu síðustu tvo mánuði fyrir fæðingu barns er heimilt að taka styrkinn í minnkuðu hlutfalli í samráði við vinnuveitanda.
Nám og vinna
Það gæti verið betra fyrir foreldri sem hefur unnið launuð störf í að minnsta kosti 25% starfshlutfalli í hverjum mánuði samhliða námi síðustu 6 mánuðina fyrir fæðingu barns að sækja um greiðslur sem foreldri á vinnumarkaði. Foreldrar eru hvattir til að kanna það hjá Fæðingarorlofssjóði. Netfang: faedingarorlofssjodur@vmst.is
Tekjumissir bættur af vinnuveitanda
Foreldri getur verið heimilt að fá tekjumissi bættan sem greiðsla fæðingarstyrks bætir ekki.
Þetta á aðeins við ef foreldri hefur unnið launuð störf í að minnsta kosti 25% starfshlutfalli í hverjum mánuði samhliða námi síðustu 6 mánuðina fyrir fæðingu barns.
Þá er miðað við að vinnuveitandi megi bæta mismun á greiðslu fæðingarstyrks og meðaltals heildarlauna síðustu 2 mánuði fyrir fæðingarmánuð barns.
Ef greiðslur eru hærri en sem nema þessu meðaltali er hætta á að foreldri fái of háan styrk greiddan miðað við réttindi. Foreldrar eru hvattir til að hafa samband við Fæðingarorlofssjóð til að vita hver upphæðin er sem ekki má fara yfir. Netfang: faedingarorlofssjodur@vmst.is
