Strandveiðileyfi

Ef þú hyggst kaupa bát til strandveiða er mikilvægt að þú kynnir þér hvaða skilyrði og reglur gilda þegar sótt er um strandveiðileyfi.

Kaup á báti verða einnig að vera frágengin með afsali fyrir lok umsóknarfrests um strandveiðileyfi. Ef ekki hefur verið gengið frá kaupum innan frestsins getur nýr eigandi ekki stundað strandveiðar á skipinu fyrr en á næsta ári.

Skilyrði fyrir strandveiðibáta

Bátur sem nota á við strandveiðar þarf að uppfylla gildandi reglur. Reglur geta breyst milli strandveiðitímabila.

Í grunninn þarf að vera hægt að svara eftirfarandi fullyrðingum játandi:

Hér á eftir er nánari skýring á hverju skilyrði.

1. Ekki þróunarsjóðsbátur

Bátar sem eru eða hafa verið skilgreindir sem þróunarsjóðsbátar geta ekki fengið leyfi til atvinnuveiða, þar með talið strandveiðileyfi. Þú getur athugað hvort bátur sé þróunarsjóðsbátur með því að:

• leita að bátnum á vef Fiskistofu

• skoða skipasögu hans

Ef útgerðarflokkur bátsins hefur einhvern tíma verið þróunarsjóður telst báturinn úreltur úr fiskveiðistjórnunarkerfinu og getur ekki stundað strandveiðar.

2. Haffærisskírteini til fiskveiða

Til að fá strandveiðileyfi þarf bátur að hafa gilt haffærisskírteini til fiskveiða.

Samgöngustofa:

• veitir haffærisskírteini

• veitir upplýsingar um hvort skírteini sé gilt

• veitir leiðbeiningar um hvað þarf til að fá skírteini á bát

3. Ekki í neikvæðri millifærslustöðu

Ef bátur hefur flutt meiri aflaheimildir frá sér en til sín telst hann vera í neikvæðri millifærslustöðu og getur þá ekki stundað strandveiðar. Við kaup á bát þarf því að athuga stöðu hans:

• Í yfirliti skips hjá Fiskistofu má staðan „Milli skipa“ ekki vera neikvæð í þorskígildum.

Hægt er að leiðrétta neikvæða stöðu með því að færa aflamark á bátinn. Athugið þó að:

• Bátur sem hefur fengið strandveiðileyfi má ekki fara í neikvæða stöðu út fiskveiðiárið.

• Þetta á einnig við þótt báturinn segi sig úr strandveiðikerfinu.

4. Engin aðild að öðru strandveiðileyfi

Eigandi eða útgerð strandveiðibáts má aðeins eiga aðild að einu strandveiðileyfi. Ef kaupandi er:

• fyrirtæki, eða

• einstaklingur sem tengist fyrirtæki,

þá má hvorki fyrirtækið né eigendur þess eiga aðild að öðru strandveiðileyfi. Við kaup á bát þarf því að ganga úr skugga um að nýir eigendur eða útgerð tengist ekki öðru strandveiðileyfi.

Upplýsingar má nálgast með:

• skoðun á útgerðarflokki skips hjá Fiskistofu

  • bátur í núllflokki telst vera án útgerðar

• skráningu eigenda hjá Samgöngustofu

• skráningu í fyrirtækjaskrá Skattsins eða hlutaskrá fyrirtækis ef um lögaðila er að ræða

5. Meira en 50% eignarhlutur

Til að fá strandveiðileyfi þarf einn eigandi að eiga meira en 50% í bátnum og verður sá aðili að vera um borð í bátnum í hverri veiðiferð.

Eignarhald getur verið:

• beint, eða

• í gegnum fyrirtæki, að því tilskildu að viðkomandi eigi meira en 50% í fyrirtækinu.

• í gegnum lögaðila en þá miðar Fiskistofa við skráningu í fyrirtækjaskrá Skattsins.

Athugið

Ef breyting er gerð á eignarhaldi bátsins eða útgerð hans eftir að strandveiðileyfi hefur verið veitt þá fellur strandveiðileyfið niður og getur báturinn þá ekki verið notaður frekar til strandveiða á tímabilinu.