Þjónustufulltrúi á Siglufirði

Fjölbreytt starf þjónustufulltrúa hjá Sýslumanninum á Norðurlandi eystra, með starfsstöð á Siglufirði, er laust til umsóknar.

Um er að ræða áhugavert, fjölbreytt og krefjandi skrifstofustarf.

Starfið felst í vinnslu sérverkefnis tengt útgáfu leyfisbréfa til löggiltra fasteigna-, fyrirtækja- og skipasala, auk vinnslu annarra sérverkefna embættisins, sem unnin eru í teymi starfsfólks.

Að auki felast í starfinu fjölbreytt afgreiðsluverkefni og afleysingar vegna þeirra fjölmörgu málaflokka sem sýslumannsembættið sinnir sem og þeirra verkefna sem unnin eru í umboði annarra stofnana. Þjónustufulltrúi vinnur að faglegri afgreiðslu mála samkvæmt gildandi lögum og verkferlum.

• Starfsreynsla og þekking sem nýtist vel í starfi

• Góð þekking og færni á helstu tölvuforritum

• Hæfni til að tileinka sér ýmis sérhæfð tölvukerfi nauðsynleg

• Vandvirkni og ögun í vinnubrögðum og skipulagsfærni

• Mjög gott frumkvæði og sjálfstæði í starfi

• Framúrskarandi þjónustulund

• Jákvæðni og færni í mannlegum samskiptum

• Góð íslensku- og enskukunnátta

Laun samkvæmt gildandi kjarasamningi sem fjármála- og efnahagsráðherra og Sameyki hafa gert.

Með umsókn um starfið skal fylgja ítarleg starfsferilsskrá ásamt upplýsingum um meðmælendur, auk annarra atriða sem máli kunna að skipta. Öllum umsóknum verður svarað þegar ákvörðun um ráðningu liggur fyrir. Tekið er fram að umsóknir geta gilt í 6 mánuði, sbr. reglur nr. 1000/2019 um auglýsingar lausra starfa. Allir einstaklingar óháð kyni eru hvattir til að sækja um starfið. Æskilegt er að viðkomandi getið hafið störf sem fyrst.

Embætti sýslumannsins á Norðurlandi eystra leggur áherslu á góða þjónustu og öfluga liðsheild og mjög góðan starfsanda. Tekin hefur verið upp 36 stunda vinnuvika. Skrifstofur embættisins eru á Siglufirði, Akureyri, Húsavík, Dalvík og Þórshöfn og starfsfólk er 25 talsins.

Embættið annast verkefni á borð við umsóknir um vegabréf og ökuskírteini, innheimtu skatta og annarra gjalda, starfrækir umboð Sjúkratrygginga Íslands og Tryggingastofnunar, sinnir ýmsum opinberum skráningum svo sem þinglýsingum og fer með ýmsa málaflokka á borð við fjölskyldumál og fullnustugerðir.

Sýslumenn fara með framkvæmdavald ríkisins í héraði og veita margvíslega opinbera þjónustu um land allt, ýmist rafrænt eða á fjölmörgum skrifstofum sýslumanna. Nýr kafli er hafinn í sögu embættanna sem byggir á tækniframförum, stafrænni vegferð og þróun þjónustulausna.