Vinnutími starfsfólks er mikilvægur hluti af skipulagi vinnustaða og er einn af þeim sálfélagslegu áhættuþáttum sem þarf að meta í vinnuumhverfinu. Þess vegna þarf að skrá vinnutíma í hlutlægu, áreiðanlegu og aðgengilegu kerfi innan vinnustaðarins.

Upplýsingarnar skulu vera aðgengilegar starfsfólki tólf mánuði aftur í
tímann samanber 57. gr. a laga um aðbúnað, hollustuhætti og öryggi á vinnustöðum, með síðari breytingum.

Í skráningarkerfum vinnustaða þurfa að vera upplýsingar um:

• daglegan og vikulegan vinnutíma

• á hvaða tíma sólarhrings unnið er

• samfelldan hvíldartíma

• vikulegan frídag

• tilvik þar sem vikið hefur verið frá reglum um hvíldartíma og vikulegan frídag

• hvort starfsfólk hafi fengið hvíld síðar þegar vikið hefur verið frá reglum

Þannig fá vinnustaðirnir betri yfirsýn yfir vinnutíma starfsfólksins og geta gripið fyrr inn í ef vinnutíminn samræmist ekki vinnutímareglum laga um aðbúnað, hollustuhætti og öryggi á vinnustöðum.  

Vinnuverndarlögin fjalla um skipulag vinnutíma

Þar gildir meðal annars að starfsfólk eigi rétt á: 

• Að minnsta kosti 11 klukkustunda hvíld á hverjum 24 klukkustundum, reiknað frá byrjun vinnudags. 

• Hléi ef daglegur vinnutími er lengri en sex klukkustundir. 

• Að minnsta kosti einn vikulegan frídag sem tengist beint daglegum hvíldartíma. 

• Hámarksvinnutími á viku að yfirvinnu meðtalinni skal ekki vera umfram 48 klukkustundir að meðaltali á hverju fjögurra mánaða tímabili. 

Sérstakar reglur gilda um vinnutíma barna og unglinga.  

Undanþágur geta gilt frá þessum meginreglum sem samið hefur verið um með samkomulagi samtaka aðila vinnumarkaðarins eða í kjarasamningum.

Skráning vinnutíma er mikilvæg fyrir starfsfólk jafnt sem vinnuveitendur. 

Saman tryggjum við að öll komi heil heim starfsævina á enda.