Á undanförnum mánuðum hefur verið unnið að því að bæta stafrænt umsóknarferli fyrir stæðiskort (P-merki) og auka sjálfvirkni í afgreiðslu og upplýsingagjöf til umsækjanda.

Handhafar stæðiskorts fá nú sjálfkrafa tölvupóst þegar stæðiskort þeirra er að renna út, ásamt skýrum leiðbeiningum um endurnýjun. Einnig fá umsækjendur tilkynningu þegar læknisvottorð hefur borist rafrænt og þegar stæðiskort er tilbúið til afhendingar, allt í gegnum pósthólf á Ísland.is.

Stafræna leiðin orðin vinsælust - einfaldari og aðgengilegri

Sífellt fleiri kjósa að sækja um stæðiskort stafrænt í gegnum Ísland.is. Á árinu 2025 hafa fleiri stæðiskort verið gefin út með rafrænum hætti en með handskráningu. Fólk kýs stafrænu leiðina af því hún er þægileg, aðgengileg og leiðir þig áfram skref fyrir skref í gegnum ferlið. Þetta hefur einfaldað umsóknarferlið og sparað umsækjendum tíma.

Við hvetjum alla sem sækja um stæðiskort til að nýta stafræna þjónustu á https://island.is/p-merki-staediskort, þar sem leiðbeiningar hjálpa notendum að ljúka umsókn fljótt og örugglega.