Táknmál eru sjónræn mál sem byggja á táknum sem sett eru saman úr fimm einingum; handformi,
hreyfingu, myndunarstað, afstöðu og munnhreyfingu. Allar þessar einingar þurfa að vera til staðar
svo út komi heilt tákn. Þessar einingar táknanna má bera saman við þær hljóðkerfisfræðilegu
einingar sem við höfum í raddmálum.

Fræðilegar málvísindarannsóknir eru unnar í samstarfi við Rannsóknarstofu í táknmálsfræðum, við Háskóla Íslands og við erlenda aðila. Rannsóknirnar eru oft hluti af lokaverkefnum rannsakenda á háskólastigi.

Niðurstöður rannsókna á málfræði íslensks táknmáls hafa verið birtar í ritrýndum greinum og á ráðstefnum, ásamt því að hafa verið nýttar í kennslu og námsefnisgerð á öllum skólastigum.

Sjá nánar birtar greinar og lokaritgerðir um málfræðirannsóknir (pdf).

Íslenskt táknmál í máltöku táknmálsbarna er lykillinn að framtíðinni. Því þarf að leggja áherslu á
aðgengi foreldra að upplýsingum um ÍTM, tækifæri táknmálsbarna til náms með öðrum
táknmálsbörnum, kennslu á og í ÍTM, aðgengi táknmálsbarna að mál- og menningarsamfélagi ÍTM,
tækifæri/aðgengi allra til náms í ÍTM og að menntastefnur tryggi jafna stöðu ÍTM og íslensku.

Verkefni sem unnið er að eru til dæmis:

• Þróun prófa og greiningartækja til að meta færni í íslensku táknmáli.

• Gerð færnimats sem skoðar málkunnáttu, málnotkun og hugarkenningu.

• Notkun á færnimati til að útbúa aldursviðmið fyrir málþroska og staðla greiningarpróf fyrir íslenskt táknmál.

• Þróun og prófanir á aðferðum við málörvun á íslensku táknmáli.

Rannsóknastofa í táknmálsfræðum er starfrækt við Háskóla Íslands og heyrir undir Hugvísindasvið.

Hún byggist á samstarfi Málvísindastofnunar og Samskiptamiðstöðvar heyrnarlausra og heyrnarskertra. Markmið Rannsóknastofu í táknmálsfræðum er að stuðla að auknum rannsóknum á táknmáli, táknmálssamskiptum, túlkun, málþroska táknmálstalandi barna og kennslufræði táknmáls og táknmálstúlkunar og samvinnu milli þeirra sem þær stunda til að tryggja sem besta nýtingu þekkingar og fjármuna.