Samgöngustofa tekur saman upplýsingar sem notaðar eru til greiningar á umferðaröryggismálum á Íslandi og til stefnumörkunar í baráttunni fyrir bættu umferðaröryggi.

Markmið stjórnvalda á Íslandi í umferðaröryggismálum: 

• Að fjöldi látinna í umferðinni á hverja 100 þúsund íbúa verði ekki meiri en það sem lægst gerist hjá öðrum þjóðum, fyrir árið 2034.

• Að fjöldi látinna og alvarlegra slasaðra í umferðinni lækki að jafnaði um 5% á ári til ársins 2034.

• Grunngildi fyrir seinna markmiðið er meðaltal áranna 2015-2019.

Nokkur atriði úr slysaskýrslu 2025

• 10 einstaklingar létust í jafnmörgum banaslysum.

• Einn erlendur ferðamaður lést og sömuleiðis lést einn erlendur ríkisborgari búsettur hérlendis.

• Sjö karlmenn og þrjár konur létust og af þeim 14 ökumönnum sem komu við sögu í banaslysum voru 11 karlmenn.

Tveir fótgangandi létust, einn á bifhjóli og einn í steypubíl. Hinir sex voru í fólksbifreið.

Saga skráningar

Markviss skráning umferðarslysa hófst hér á landi árið 1966 og var tilgangur skráningar að fá marktækan samanburð á slysatíðni fyrir og eftir árið 1968, þegar hægri umferð tók gildi.

• Slysaskráningin byggir á lögregluskýrslum úr gagnagrunni Ríkislögreglustjóra.

• Frá árinu 2009 hefur auk þess verið stuðst við gögn frá Aðstoð og öryggi. Í skráningum frá Aðstoð og öryggi er eingöngu um eignatjón að ræða en fyrirtækið er sjálfstætt starfandi og hlutlaust þjónustufyrirtæki sem annast vettvangsrannsóknir umferðaróhappa.

Skráning umferðaslysa

Þegar meiðsl verða á fólki í umferðarslysum er skylt að kalla til lögreglu. Í skráningu umferðarslysa er meiðslum skipt niður í tvo flokka, lítil meiðsl og mikil meiðsl.

• Vegfarandi telst ekki slasaður nema hann hafi með sannanlegum hætti verið fluttur á sjúkrahús, heilsugæslustöð eða undir læknishendur með sjúkrabifreið, lögreglubifreið, þyrlu eða hann komi til lögreglu og gefi skýrslu um að hann hafi leitað læknisaðstoðar vegna meiðsla.

• Banaslys í umferð eru skilgreind þannig að látist einstaklingur af völdum áverka sem hann hlýtur í umferðarslysi innan 30 daga frá því að slysið á sér stað telst hann hafa látist í umferðarslysi.

Rannsóknir sem gerðar hafa verið á umferðarslysum sýna að hin opinbera skráning nær ekki til allra þeirra sem slasast í umferðinni.

• Umferðarslys eru stundum tilkynnt til lækna eða sjúkrastofnana en ekki lögreglu. Skiptir þá miklu hver alvarleiki meiðslanna er.

• Gera má ráð fyrir að þeir sem slasast lítið tilkynni það síður til lögreglu.

Sjúkrastofnanir og tryggingafélög skrá mun fleiri minniháttar meiðsl af völdum umferðarslysa en fram kemur í skráningu Samgöngustofu.