15. nóvember 2026

Dagurinn er til að minnast þeirra sem látist hafa í umferðinni, leiða hugann að ábyrgð hvers og eins í umferðinni en ekki hvað síst að þakka þeim viðbragðsaðilum sem veita hjálp og björgun. Að þessu sinni er sérstök áhersla lögð á unga vegfarendur.

Sameinuðu þjóðirnar hafa tileinkað þriðja sunnudag í nóvember alþjóðlegum minningardegi um fórnarlömb umferðarslysa.

Í ár verður m.a. haldin minningarathöfn kl. 14:00 við þyrlupallinn við Landspítalann í Fossvogi en auk þess munu einingar Slysavarnafélagsins Landsbjargar og fleiri viðbragðsaðilar standa fyrir táknrænum athöfnum víða um land. Upplýsingar um þá viðburði verða birtar síðar hér að neðan. Öll eru velkomin.  

Minningardagurinn í ár er sunnudaginn 15. nóvember.

Hér á landi hefur skapast sú venja að tileinka daginn umfjöllun og forvörnum tiltekins áhættuþáttar í umferðinni eða ákveðnum hópi vegfarenda. Á hverju ári verða alvarleg slys og banaslys þar sem reynsluleysi, hættulegt viðhorf og áhættuhegðun ungra ökumanna koma við sögu. Ungir ökumenn eru hlutfallslega í meiri hættu en aðrir í umferðinni og því er ætlunin nú í ár að beina sjónum sérstaklega að þessum hóp.   
 
Að baki minningardeginum standa auk Samgöngustofu, innviðaráðuneytið, Sjálfsbjörg, Slysavarnafélagið Landsbjörg, Neyðarlínan, Lögreglan, Vegagerðin og ÖBÍ réttindasamtök.   

Dagskrá í Reykjavík

13:45 – Þyrla Landhelgisgæslunnar lendir – viðbragðsaðilar koma sér fyrir.

Myndataka – viðbragðsaðilar ásamt forseta framan við ökutæki og þyrlu Landhelgisgæslunnar.

14:00 – Setning – Ingilín Kristmannsdóttir, ráðuneytisstjóri innviðaráðuneytisins.

14:05 – Hfalla Tómasdóttir forseti Íslands flytur ávarp.

14:10 – Forseti Íslands stýrir einnar mínútu þögn.

14:11 – Eyjólfur Ármannsson innviðaráðherra flytur ávarp.

14:16 – Ræðumaður dagsins fjallar um reynslu sína.

14:23 – Kór Menntaskólans við Hamrahlíð flytur lag dagsins, I Think of Angels eftir KK.

14:28 – Formlegri athöfn slitið – Ingilín Kristmannsdóttir ráðuneytisstjóri innviðaráðuneytisins. Boðið upp á kaffi, kakó og með því.

14:30 – Forseti Íslands færir starfsfólki bráðamóttöku Landspítalans veitingar og þakklætisvott.

Útvarpsstöðvar landsins sameinast í spilun á I Think of Angels.

Lagið I Think of Angels er einkennislag minningardagsins hér á landi. Það er samið af KK (Kristjáni Kristjánssyni) og sungið af systur hans Ellen. Kristján samdi lagið til minningar um systur þeirra sem lést í umferðarslysi í Bandaríkjunum árið 1992. 

Stefnt er að því að allar útvarpsstöðvar landsins sem eru með beinar útsendingar sameinist í spilun lagsins kl. 14:00 á minningardeginum. Auk þess mun kór flytja lagið við athöfnina í Reykjavík.  

Hvers vegna minningardagur?

Um það bil 3.600 einstaklingar láta lífið og hundruð þúsunda slasast í umferðinni í heiminum á degi hverjum. Það eru u.þ.b. 1.3 milljónir á einu ári.

Frá því að fyrsta banaslysið var skráð á Íslandi 25. ágúst 1915, hafa þann 20. október 2026 samtals 1643 einstaklingar látist í umferðinni hér á landi. Nú í ár hafa 8 látist en í fyrra létust 10 manns. Mun fleiri hafa slasast alvarlega, tekist á við áföll, sorgir og eftirsjá af þessum völdum.

Við vonum að fólk sýni viðeigandi hluttekningu á þessum degi og tryggi sem best öryggi og ábyrgð sína í umferðinni.