Formaður sjóðsins, Karen Sif Jónsdóttir, afhenti styrkina.

Styrki hlutu:

Ragnheiður Harpa Arnardóttir til rannsóknar á umfangi, eðli, ástundun og árangri viðhaldsþjálfunar fyrir fólk með hjarta- og/eða lungnasjúkdóma á HL-stöðvunum í Reykjavík og á Akureyri á árunum 2010–2026. Markmið rannsóknarinnar er að skoða umfang, nýtingu og árangur viðhaldsþjálfunar Hjarta- og lungnastöðvanna og meðal annars kanna hvort munur sé á árangri eftir kyni og því hvort þátttakendur séu með hjarta- eða lungnasjúkdóm.

Þórhalla Sigurðardóttir til rannsóknar á viðhorfum og reynslu hjúkrunarfræðinga af hjúkrun fólks með krabbamein á bráðamóttökum og mati þeirra á eigin hæfni og þekkingu. Markmið rannsóknarinnar er að kanna viðhorf og reynslu hjúkrunarfræðinga á bráðamóttökum af hjúkrun einstaklinga með krabbamein og skoða hvernig þeir meta eigin hæfni, þekkingu og sjálfsöryggi í slíkum aðstæðum.

Hrafnhildur Lilja Jónsdóttir til rannsóknar á ánægju hjúkrunarnema með hermikennslu á endurlífgunarnámskeiði. Markmið rannsóknarinnar er að kanna ánægju fjórða árs hjúkrunarnema með hermikennslu á stöðluðu ILS-námskeiði og meðal annars skoða hvort munur sé á ánægju eftir kennsluumhverfi.