Sjóðurinn er hluti af aðgerðaráætlun fjölmiðla, sem kveður á um að stutt verði við þróun nýrra fréttamiðla og nýsköpunarverkefni innan eldri fréttamiðla, þar á meðal þróun tæknilegrar nýbreytni og nýrra miðlunarleiða - sjá nánar tiltekið aðgerð 8.

Undir tæknilega nýbreytni falla t.d. stafrænar lausnir sem byggjast á gervigreind og lausnir sem nýtast við sölu vefáskrifta. 

Reglur nr. 986/2026 um úthlutun styrkja úr sjóðnum voru birtar 14. september 2026. Í reglunum kemur fram að sjóðnum sé ætlað að veita styrki til skilgreindra verkefna sem stuðla að nýsköpun, tækniþróun og þróun nýrra viðskiptaaðgerða á einkareknum fjölmiðlum.

Uthlutanir úr sjóðnum verða annars vegar í formi verkefnastyrkja til stofnunar og þróunar nýrra fréttamiðla og hins vegar til nýsköpunarverkefna innan starfandi fréttamiðla. Til úthlutunar árið 2026 verða 40 m.kr. að frádregnum umsýslukostnaði. 

Umsækjendum er bent á að kynna sér reglur nr. 986/2026 í heild sinni og hvaða kröfur eru gerðar um gögn sem eiga að fylgja umsókn. 

 Í 7. gr. reglnanna eru tilgreind skilyrði fyrir styrkveitingu til nýrra fjölmiðla og í 8. gr. eru tilgreind skilyrði fyrir styrkveitingu til starfandi fjölmiðla. Í 4. gr. er getið sérstakra atriða sem þurfa að koma fram í umsókn. Umsækjendum er heimilt að sækja um styrk til fleiri verkefna en eins en ber þá að skila sérstakri umsókn fyrir hvert verkefni fyrir sig. 

•  Umsóknarfrestur til 16. nóvember 2026 kl 15:00. 

• Eindregið er mælt með að skila ekki umsókn á síðasta degi. 

• Tekið er á móti fyrirspurnum á netfangið fjolmidlasjodur@rannis.is  

• Hægt er að nálgast tengil í umsóknarkerfi á vefsíðu sjóðsins hjá Rannís.