Hér má nálgast kennslumyndbönd og leiðbeiningar fyrir notendur rafrænna ferilbóka

Um rafræna ferilbók

Nemendur

Tilsjónaraðilar

Fyrir umsjónaraðila skóla

Fyrir birtingaskrá

Að stofna ferilbók nema:

Notandi skráir sig inn með rafrænum skilríkjum.
Til að hægt sé að skrá nemanda í rafræna ferilbók þarf hann fyrst að vera skráður í upplýsingakerfi skólans, Innu.
Sá starfsmaður skólans sem er umsjónarmaður ferilbókar við skólann velur fyrst „Ferilbækur“.

1. Opna ferilbækur

Undir flipanum Ferilbækur er yfirlit yfir allar ferilbækur sem skólinn hefur stofnað fyrir nemendur.

Til að stofna nýja ferilbók er smellt á Virkja ferilbók. Þá opnast skráningarsíðan.

2. Velja starfsgrein og ferilbók

Veldu:

• starfsgrein

• útgáfu ferilbókar

Ef fleiri en ein útgáfa er í boði þarf að velja rétta útgáfu. Yngsta útgáfan er að jafnaði sú sem er í gildi.

3. Skrá gildistíma

Skráðu upphafsdag ferilbókarinnar.

Mælt er með að lokadagur sé ekki skráður fyrr en við lok samningstímans. Eftir að lokadagurinn er liðinn er ekki lengur hægt að gera breytingar á ferilbókinni.

Athugið:

• Nemandi sér ekki ferilbókina fyrr en á upphafsdegi hennar.

• Ekki er hægt að breyta ferilbókinni eftir lokadag.

• Nemandi heldur þó lesaðgangi að ferilbókinni eftir að námi og samningstíma lýkur.

4. Skrá vinnustað og tilsjónaraðila

Veldu vinnustað úr listanum Veldu vinnustað.

Listinn sýnir aðeins vinnustaði sem:

• eru skráðir í kerfið og

• tengjast viðkomandi starfsgrein.

Ef vinnustaður hefur ekki verið ákveðinn má sleppa þessum reitum í bili. Þeir verða þó að vera útfylltir þegar samningur er undirritaður.

Athugið:

• Vinnustaður fær ekki aðgang að ferilbók nemandans fyrr en samningur hefur verið undirritaður.

• Skrá þarf meistara sem tilsjónarmann ef um lögverndaða iðngrein er að ræða.

• Haka þarf við Undirritar samninga hjá þeim tilsjónarmanni sem undirritar samninginn.

• Hægt er að bæta við fleiri tilsjónarmönnum með því að velja Bæta við.

• Aðeins einn tilsjónarmaður á vinnustað undirritar samning.

5. Skrá umsýsluaðila skólans

Veldu þann starfsmann skólans sem mun:

• hafa umsjón með ferilbókinni,

• fylgjast með framvindu nemandans og

• staðfesta framvindu hans.

Hægt er að skrá fleiri en einn umsýsluaðila, en velja þarf einn sem Undirritar samninga.

Athugið að aðeins einn starfsmaður skólans undirritar hvern samning, þó fleiri geti sinnt eftirfylgni.

6. Virkja ferilbók

Þegar öllum upplýsingum hefur verið lokið er smellt á Virkja.

Ferilbók nemandans hefur þá verið stofnuð.

Miðstöð menntunar og skólaþjónustu hefur umsjón með innleiðingu rafrænnar ferilbókar í vinnustaðanámi. Ferilbókin byggir á reglugerð um vinnustaðanám sem tók gildi 1. ágúst 2021.

Markmið rafrænnar ferilbókar er að efla gæði vinnustaðanáms með því að skapa sameiginlegan samskiptavettvang fyrir nemendur, vinnustaði, skóla og aðra sem koma að starfsnámi. Ferilbókin heldur utan um þá verkþætti og hæfni sem nemandi þarf að hafa tileinkað sér við lok starfsnáms.

Ferilbókin byggir á starfslýsingum og hæfnikröfum sem starfsgreinaráð unnu í samstarfi við Menntamálastofnun og síðar Miðstöð menntunar og skólaþjónustu. Starfslýsingar og hæfnikröfur endurspegla þarfir atvinnulífsins fyrir þekkingu og hæfni og liggja til grundvallar námsbrautalýsingum viðkomandi starfsgreina sem eru hluti af aðalnámskrá framhaldsskóla.

Rafræn ferilbók tryggir að nemendur fái þjálfun í þeim verkþáttum sem hæfnikröfur starfsins gera ráð fyrir. Hún stuðlar að auknum gæðum starfsnáms, markvissari þjálfun og styrkir réttindi starfsnámsnema. Námssamningar eru jafnframt vistaðir í ferilbókinni.

Ferilbókin einfaldar samskipti milli skóla og atvinnulífs og auðveldar utanumhald vinnustaðanáms.

Mennta- og barnamálaráðuneytið hefur tekið saman helstu spurningar og svör er varða vinnustaðanám og notkun rafrænna ferilbóka.