Skólar hafa í heildina fjórar vikur til að leggja prófin fyrir og því er áfram gott svigrúm fyrir þá skóla sem eiga eftir að leggja prófin fyrir á næstu dögum og vikum.

Samstarf Miðstöðvar menntunar og skólaþjónustu við skóla um allt land hefur verið mikið í vikunni og starfsfólk miðstöðvarinnar hefur verið í nánu sambandi við skólastjórnendur og kennara til að styðja við fyrirlögn prófanna.

„Við viljum þakka skólastjórnendum, kennurum og öðru starfsfólki skólanna fyrir gott samstarf í vikunni,“ segir Þórdís Jóna Sigurðardóttir, forstjóri Miðstöðvar menntunar og skólaþjónustu. „Það hefur verið mikill vilji til að finna lausnir og vinna saman þannig að fyrirlögn prófanna gangi sem best fyrir sig. Fyrir okkur hjá MMS hefur verið afar ánægjulegt að eiga svona náið samstarf við skóla um allt land.“