Íslensku menntaverðlaunin eru samstarfsverkefni embættis forseta Íslands, mennta- og barnamálaráðuneytis, innviðaráðuneytis, Samtaka iðnaðarins, Félags um menntarannsóknir, Grunns - félags stjórnenda á skrifstofum fræðslumála í sveitarfélögum, Háskólans á Akureyri, Háskóla Íslands, Kennarasambands Íslands, Listaháskóla Íslands, Miðstöðvar menntunar og skólaþjónustu, Reykjavíkurborgar, Sambands íslenskra sveitarfélaga og Samtaka áhugafólks um skólaþróun.

Markmið verðlaunanna er að vekja athygli á metnaðarfullu og vönduðu starfi í skóla- og frístundastarfi og auka veg menntaumbóta. Verðlaunin eru veitt árlega í fimm flokkum:

A. Framúrskarandi skólastarf eða menntaumbætur

Verðlaun eru veitt skóla eða annarri menntastofnun sem stuðlað hefur að framúrskarandi menntaumbótum.

B. Framúrskarandi kennari

Verðlaun eru veitt kennara sem hefur lagt fram framúrskarandi framlag til menntaumbóta.

C. Framúrskarandi þróunarverkefni

Verðlaun eru veitt þróunarverkefni sem uppfyllir metnaðarfull gæðaviðmið um markmið, framkvæmd, mat og miðlun og hefur skýrt mennta- og uppeldislegt gildi.

D. Framúrskarandi iðn- eða verkmenntun

Verðlaun eru veitt kennara, námsefnishöfundi, skóla eða menntastofnun fyrir framúrskarandi framlag til iðn- eða verkmenntunar.

E. Hvatningarverðlaun

Hvatningarverðlaun eru veitt einstaklingi, hópi eða samtökum sem hafa stuðlað að framúrskarandi menntaumbótum.

Hægt að senda inn tillögur til 1. júní

Tillögur að tilnefningum skulu hafa borist fyrir 1. júní 2026.

Viðurkenningarráð velur þrjár til fimm tilnefningar í hverjum flokki sem kynntar verða á alþjóðadegi kennara 5. október. Verðlaunin verða síðan afhent við hátíðlega athöfn á Bessastöðum í nóvember.

Hægt er að senda inn tillögur og lesa nánar um verðlaunin á vef Samtaka áhugafólks um skólaþróun:
Íslensku menntaverðlaunin

Einnig má senda tillögur í pósti á:

Íslensku menntaverðlaunin
hjá Ingvari Sigurgeirssyni
Sóltúni 16
105 Reykjavík

Merkið umslagið: Íslensku menntaverðlaunin

Saga verðlaunanna

Ólafur Ragnar Grímsson stofnaði til Íslensku menntaverðlaunanna og voru þau veitt á árunum 2005–2011. Verðlaunin lögðust af í kjölfar efnahagshrunsins en voru endurreist árið 2020. Við endurreisnina lagði embætti forseta Íslands til gögn tengd verðlaununum, meðal annars merki þeirra og hönnun verðlaunagripa.