Á ráðstefnunni komu saman sérfræðingar og fagfólk frá Norðurlöndunum til að miðla þekkingu og reynslu af menntun barna og ungmenna með fjölbreyttan tungumála- og menningarbakgrunn.

Megináhersla var lögð á inngildingu í skólastarfi, kennslu skólatungumálsins, mat á framförum í tungumálanámi og samstarf þvert á stofnanir og skólastig.

Þekkingarmiðlun og samstarf þvert á Norðurlöndin

Dagskráin var fjölbreytt og samanstóð af fjölbreyttum erindum, vinnustofum, skólaheimsóknum og faglegum umræðum. Þátttakendur kynntu rannsóknir, þróunarverkefni og starfshætti frá Norðurlöndunum. Sérstök áhersla var lögð á hvernig samstarf fagfólks og markviss tungumálakennsla getur stutt við námsframvindu, virka þátttöku og tilfinningu nemenda fyrir að tilheyra skólasamfélaginu.

Meðal íslenskra verkefna sem kynnt voru má nefna MEMM - Menntun, móttöku og menningu, Mál og læsi í Fellahverfi (MOLF), Sprett og Íslenskuþorpið. Einnig var fjallað um kennslu íslensku sem annars tungumáls og norrænan samanburð á matstækjum í tungumálanámi.

Þátttakendur heimsóttu jafnframt skóla á höfuðborgarsvæðinu og fengu innsýn í íslenskt skólastarf og fjölbreyttar leiðir til að styðja við nám og inngildingu.

Sameiginleg þekking í þágu nemenda

FLIN er norrænt samstarfsnet 20 stofnana og samtaka sem starfa á sviði fjöltyngis, tungumálanáms og inngildingar. Ráðstefnan skapaði mikilvægan vettvang fyrir faglega umræðu, ný tengsl og áframhaldandi samstarf milli Norðurlandanna.