Á vormisseri 2026 unnu fjórir nemendur við Háskólann í Reykjavík að lokaverkefni í hugbúnaðarverkfræði og tölvunarfræði þar sem þau þróuðu nýja gervigreindarlausn fyrir vefinn Næsta skref.

Lausnin, sem ber heitið Næsta skref AI, sækir upplýsingar af Næsta skrefi og úr Stuðningsbanka SÍF. Markmið hennar er að auðvelda fólki að nálgast upplýsingar og átta sig á mögulegum leiðum í námi og starfi með einföldum hætti.

Verkefnið var unnið með aðkomu Háskólans í Reykjavík, Miðstöðvar menntunar og skólaþjónustu, Konsept og Apró. Nemendurnir sem stóðu að verkefninu eru Hera Brá Tómasdóttir, Kateryna Tkachuk, Tómas Ari Pálsson og Valgerður Eyja Eyþórsdóttir.

Næsta skref AI er enn á þróunarstigi og verður áfram unnið að umbótum á lausninni. Til skoðunar er að veita notendum reynsluaðgang að verkfærinu til að afla frekari reynslu af notkun þess og styðja við áframhaldandi þróun.