Miðstöðin er tilnefnd fyrir tvö umfangsmikil verkefni. Annars vegar fyrir stafræna uppbyggingu menntakerfisins, þar sem verkefni á borð við Mína miðstöð, Matsferil og þátttaka í gervigreindarverkefnum með skólum hafa gegnt lykilhlutverki. Hins vegar er um að ræða sérstaka tilnefningu fyrir Nemendagrunninn, sem er ein stærsta stafræna kerfisbreyting sem ráðist hefur verið í innan íslensks menntakerfis.

Nemendagrunnurinn samræmir gagnaflæði milli 62 sveitarfélaga og um 180 grunnskóla og byggir á opnum alþjóðlegum staðli. Verkefnið hefur lagt grunn að frekari stafrænni þróun í menntakerfinu, meðal annars að því að hægt sé að leggja fyrir stöðu- og framvindupróf Matsferils rafrænt um land allt. Prófin, sem voru lögð fyrir í fyrsta skipti um allt land í mars sl., gefa börnum og skólum skýrari mynd af stöðu í námi og gera kennurum kleift að styðja markvisst við næstu skref hjá hverju barni.

„Við erum afar þakklát fyrir þessa tilnefningu. Hún er fyrst og fremst viðurkenning á því sameiginlega starfi sem unnið hefur verið í þágu barna um allt land og snýst um að skapa betri aðstæður til náms og tryggja að hvert barn fái þann stuðning sem það þarf,“ segir Þórdís Jóna Sigurðardóttir, forstjóri Miðstöðvar menntunar og skólaþjónustu.