Hlutverk Fagráðs gegn einelti er að veita skólasamfélaginu ráðgjöf og leiðbeiningar í eineltismálum ef ekki tekst að ná ásættanlegri úrlausn innan skóla og/eða sveitarfélags. Forsendur þess að mál sé tekið upp í fagráðinu eru að formleg eineltistilkynning sé til staðar og unnið hafi verið með hana skv. verkferlum skólans. Fagráðið gefur ráðgefandi álit í samræmi við gögn málsins og veitir eftirfylgd við að skýra vinnuferla, aðgerðar- og viðbragðsáætlanir.

Fagráðið er ekki stjórnvald í skilningi stjórnsýslulaga heldur er umfjöllun fagráðsins valkvæð málsmeðferð sem er óháð málsmeðferð skv. 4. gr. og 47. gr. laga um grunnskóla. Niðurstaða fagráðsins er ekki skuldbindandi fyrir aðila máls gagnvart öðrum úrræðum sem lög og reglur kunna að bjóða upp á.

Fagráðið skal viðhafa vandaða stjórnsýsluhætti við meðferð þeirra erinda sem ráðinu berast. Fagráðið skal leita eftir sjónarmiðum nemenda við úrlausn máls eftir því sem þörf krefur í samræmi við 12. gr. Barnasáttmála Sameinuðu þjóðanna.

Fagráð skal svo fljótt sem auðið er bregðast við einstökum málum. Fagráðið skoðar sjálfstætt þau mál sem því berast, út frá hagsmunum nemenda, og meta hvort viðkomandi mál heyri undir það sbr. Verklagsreglur um starfsemi fagráðs eineltismála í grunn- og framhaldsskólum.

Ef ráðið telur að ekki liggi fyrir nægilega góðar upplýsingar vegna máls sem borist hefur, skal afla nauðsynlegra gagna og upplýsinga til að unnt sé að meta næstu skref. Með upplýsingaöflun er kortlagt hvort mál hafi hlotið viðeigandi málsmeðferð innan skóla og/eða sveitarfélags. Einnig ber að kanna hvort foreldrar eða aðrir aðilar skólasamfélagsins sem vísa máli til fagráðsins séu ósáttir við fyrri málsmeðferð. Við upplýsingaöflun eru samtöl oft tekin við málsaðila, en það er háð ákvörðun fagráðs í hverju máli fyrir sig hverjir eru boðaðir í samtöl. Fagráðið hefur einnig samráð við þar til bæra sérfræðinga eftir því sem þörf krefur við úrlausn mála.

Að lokinni upplýsingaöflun er ráðgefandi álit gefið út sem er álitsgerð um málið. Þar kemur fram afstaða fagráðs til málsins, lagt mat á það sem hefur verið gert í málinu og ráðleggingar um hvernig best sé að haga málum í framhaldinu. Álitið er sent málsaðilum, þ.e. þeim sem vísa málinu til fagráðs, skóla og skólaskrifstofu. Þegar það á við gefur fagráð ráðleggingar til málsaðila áður en ráðgefandi álit er tilbúið. Álit fagráðsins eru ráðgefandi og endanleg.

Ef fagráðið telur að málið heyri ekki undir starfsemi þess er umsækjendum leiðbeint um næstu viðeigandi skref í málinu, allt eftir eðli máls. Viðeigandi úrræði gætu til dæmis verið Landsteymi, Samskiptaráðgjafi íþrótta- og æskulýðsstarfs o.fl.

Til fagráðsins geta leitað nemendur, foreldrar/forsjáraðilar og starfsfólk grunn- og framhaldsskóla. Þá geta einnigaðilar sem starfa með börnum í skóla-, frístunda- eða tómstundastarfi óskað aðkomu fagráðs.

Foreldrar/forsjáraðilar nemanda framhaldsskóla, nemendur og starfsfólk framhaldsskóla geta óskað eftir aðkomu fagráðins vegna nemendamála ef ekki tekst að finna viðunandi lausn innan skólans.