Landspítali

Við andlát á spítala

Hvort sem andlát á sér aðdraganda eða kemur fyrirvaralaust, markar það spor í líf fólks. Sorg og önnur viðbrögð eru einstaklingsbundin og taka oft mið af aðdraganda andláts.

Eftir andlát

Starfsfólk Landspítala leggur sig fram um að auðsýna bæði látnum og lifandi virðingu. Búið er um hinn látna af nærfærni og aðstandendum gefinn kostur á því að eiga nauðsynlega kveðjustund við dánarbeð.

Stuðningur í sorg

Áföll á borð við andlát ástvina geta valdið miklu tilfinningalegu álagi og er aðstandendum velkomið að hafa samband við starfsfólk sálgæslu sjúkrahúspresta og sjúkrahúsdjákna.

Prestar og djáknar Landspítala veita aðstandendum stuðning í sorg og geta vísað þeim á þá aðstoð sem hentar hverju sinni, bent á aðra sem geta hjálpað og mælt með gagnlegu lesefni.

Upplýsingar um sóknir þjóðkirkjunnar og presta má finna á vef Þjóðkirkjunnar.

Hér má finna lista yfir skráð trúfélög og lífsskoðunarfélög á Íslandi.

Frjáls félagasamtök og stuðningshópar veita einnig aðstoð við að takast á við sorg.

Sorgarmiðstöð veitir stuðning við fólk sem hefur misst ástvin og sinnir fræðslu og fyrirlestrum um sorg og sorgarviðbrögð.

Kapellur

Á Landspítala eru 6 kapellur sem eru notaðar í þjónustu presta og djákna og til samveru- og kyrrðarstunda.
Sjúkrahúsprestar og djáknar geta leitt kveðjustundir og stutt aðstandendur sé þess óskað ásamt því að hafa samband við sóknarprest eða veita frekari upplýsingar.

Að missa ástvin

Lífsviðburðurinn að missa ástvin er með gagnlegar upplýsingar og leiðbeiningar um framhaldið. Sýslumaður hefur einnig góðar upplýsingar um andlát og dánarbú.

Læknir skoðar þann látna til þess að athuga hvernig andlát hefur borið að.

Sé dánarorsök vafamál, getur læknir óskað eftir leyfi aðstandenda til krufningar í læknisfræðilegum tilgangi.
Aðstandendum er heimilt að óska eftir krufningu sé einhver vafi í huga þeirra varðandi andlátið.
Réttarkrufning er framkvæmd ef andlát ber að höndum skyndilega án þekktrar sjúkrasögu eða með voveiflegum hætti.

Læknir sem skoðar þann látna, gefur út dánarvottorð. Starfsfólk Landspítala er reiðubúið til leiðsagnar ef þú hefur spurningar.

Dánarvottorð er staðfesting á andláti einstaklings og þarf það að liggja fyrir áður en kemur að útför.

Læknir sem skoðar þann látna, staðfestir andlát og gefur út dánarvottorð sem sent er rafrænt til viðkomandi sýslumannsembættis. Með vottorðinu fylgja upplýsingar um nánasta aðstandanda.
Fari fram réttarmeinafræðileg líkskoðun eða réttarkrufning, skal sá læknir sem hana framkvæmir, gefa út dánarvottorð.

Tilkynna Sýslumanni um andlátið

Aðstandendur þurfa að tilkynna andlátið til Sýslumanns.

Sýslumaður hefur samband við nánasta aðstandanda með tölvupósti í gegnum Ísland.is og leiðbeinir um framhaldið.
Ef sýslumaður hefur ekki haft samband innan nokkurra daga er hægt að hringa í viðkomandi embætti eða fara á staðinn.