Dvalarréttur aðstandenda EES/EFTA-borgara

• Maki (hjúskaparmaki og sambúðarmaki).

• Afkomendur í beinan ættlegg, það eru börn eða barnabörn EES/EFTA-borgarans eða maka hans, sem eru yngri en 21 árs eða á þeirra framfæri.

• Ættingjar í beinan legg af eldri kynslóð, það eru foreldrar og ömmur og afar EES/EFTA-borgarans eða maka hans, sem eru á framfæri þeirra.

• Foreldri eða forsjáraðili, ef EES/EFTA-borgarinn er yngri en 18 ára.

Aðstandendur námsmanna
Aðeins maka og börnum eða ungmennum yngri en 21 árs er heimilt að dvelja hér á landi sem aðstandendur EES/EFTA-borgara sem hefur dvalarrétt hér sem námsmaður.

EES/EFTA-borgarar eru ríkisborgarar: Austurríkis, Belgíu, Búlgaríu, Danmerkur, Eistlands, Finnlands, Frakklands, Grikklands, Hollands, Írlands, Ítalíu, Króatíu, Kýpur, Lettlands, Liechtenstein, Litháen, Lúxemborgar, Möltu, Noregs, Portúgals, Póllands, Rúmeníu, Spánar, Slóvakíu, Slóveníu, Sviss, Svíþjóðar, Tékklands, Ungverjalands og Þýskalands.

Íslenskir ríkisborgarar eru ekki taldir EES/EFTA-borgarar í þessu samhengi, nema í þeim tilvikum þegar þeir hafa verið búsettir í öðru EES/EFTA-landi og nýlega flutt aftur til Íslands.

Nánasti aðstandandi íslensks ríkisborgara getur því aðeins sótt um dvalarskírteini sem aðstandandi EES/EFTA-borgara á Íslandi ef:

• íslenski ríkisborgarinn hefur búið í öðru EES/EFTA-landi með dvalarrétt í að minnsta kosti þrjá mánuði. Viðkomandi hefur haft dvalarrétt ef hann hefur til dæmis unnið, leitað að vinnu, stundað nám eða verið á eigin framfæri meðan á dvölinni í hinu EES/EFTA-landinu stóð.

• íslenski ríkisborgarinn og aðstandandi hans bjuggu saman í hinu EES/EFTA-landinu rétt áður en þau fluttu saman til Íslands.

Ef þú ert ríkisborgari lands utan EES/EFTA og vilt flytja til Íslands til að búa með íslenskum ríkisborgara sem telst ekki EES/EFTA-borgari samkvæmt ofangreindum kröfum, verður þú þess í stað að sækja um dvalarleyfi.