Almannatryggingar og búseta erlendis

Fólk sem fær lífeyrisgreiðslur á Íslandi getur flutt erlendis og fengið lífeyrinn greiddan á íslenskan eða erlendan bankareikning. Landið þarf að vera samningsríki.

Fólk sem býr erlendis við töku lífeyris sækir um íslenskan lífeyrir hjá tryggingastofnun viðkomandi lands. Landið þarf að vera samningsríki.

Upplýsingar um erlendar tekjur og lífsvottorð

Þegar lífeyrisgreiðslur frá TR eru hafnar þarftu að skila einu sinni á ári:

Fyrir 1. ágúst: afriti af skattframtali þínu og maka (ef við á) frá búsetulandi. Ef þú telur fram til skatts með maka þínum þurfið þið bæði að skila inn sundurliðun vegna tekna ykkar, til dæmis launaseðlum eða yfirliti yfir lífeyrisgreiðslur.

Fyrir 31. desember: lífsvottorði, það má vera á eyðublaði TR eða á sambærilegu eyðublaði frá búsetulandi. Það verður að vera formlega vottað af opinberum aðila í búsetulandi, til dæmis stofnun fyrir almannatryggingar, þjóðskrá, bæjar- eða skattayfirvöldum, lögreglu, læknum eða öðrum opinberum stofnunum.

Ef þessum gögnum er ekki er skilað á tilsettum tíma getur komið til stöðvunar greiðslna frá TR.

Athugið, ef þú skilar ekki skattframtali í búsetulandi vegna þess að tekjur eru undir viðmiðunarmörkum þarf staðfesting þar að lútandi að berast frá skattayfirvöldum í því landi. Þá þarf líka að skila inn afriti af greiðsluseðlum lífeyris og/eða launa.

Upplýsingar um erlent heimilisfang

Þegar greiðslur hefjast hjá TR skráum við erlent heimilisfang þitt sem kemur fram í umsókn. Ef til flutninga kemur frá Íslandi eftir að lífeyrisgreiðslur hefjast er mikilvægt að láta TR vita um nýtt heimilisfang þitt. Einnig þarftu að láta TR vita ef þú flytur á milli staða erlendis.

Ef ekki er látið vita um nýtt heimilisfang getur komið til stöðvunar greiðslna.

Hægt er að senda upplýsingar um nýtt heimilisfang á eftirfarandi hátt:

• senda erindi í gegnum Mínar síður á tr.is,

• senda tölvupóst á netfangið eftirlit@tr.is