Upplýsingaskylda erlendra þjónustufyrirækja

Erlendum þjónustufyrirtækjum, með staðfestu innan Evrópska efnahagssvæðisins (EES), EFTA-ríkis eða Færeyja, er heimilt að senda starfsfólk (útsenda starfsmenn) tímabundið til Íslands til að veita þjónustu.

Fyrirtækin skulu samkvæmt lögum um útsenda starfsmenn og skyldur erlendra þjónustuveitenda, upplýsa Vinnueftirlitið um starfsemi sína, fyrirtækið og starfsfólkið sem kemur hingað til lands.

Fyrirtækin þurfa að fylgja íslenskum lögum og reglum á meðan þau starfa á Íslandi og tryggja að réttindi starfsfólks sem starfar á þeirra vegum séu í samræmi við íslensk lög.

Á vefsíðunni: Erlend þjónustufyrirtæki og útsendir starfsmenn (posting.is) er að finna upplýsingar um hvaða gögn fyrirtækin þurfa að senda til Vinnueftirlitsins og hvaða skyldur þau hafa gagnvart starfsfólki sínu. Samskonar reglur gilda um erlenda sjálfstætt starfandi einstaklinga sem koma hingað til lands til að veita þjónustu.

Á síðunni er einnig fjallað um réttindi og skyldur útsendra starfsmanna og ábyrgð notendafyrirtækja.