Utanlandsferðir barna

Með samþykkisyfirlýsingunni veita forsjáraðilar heimild fyrir því að barnið ferðist 

• einsamalt eða í fylgd tilgreinds aðila 

• til tiltekins lands eða tiltekinna landa 

• á tilgreindu tímabili 

Ef um er að ræða fleiri en eitt barn, er gerð sérstök yfirlýsing fyrir hvert þeirra.

Mikilvægt er að það sem er skráð í samþykkisyfirlýsingunni sé rétt.

Aðilar geta einnig útbúið eigin yfirlýsingu eða heimild vegna ferðalagsins og aðlagað texta að sínum þörfum. Æskilegt er að textinn sé á ensku eða tungumáli þess lands sem ferðast er til.

Vottun samþykkisyfirlýsingar

Gott er að kynna sér hvaða kröfur eru gerðar til vottunar skjala í landinu sem ferðast er til. Samkvæmt almennum reglum er nóg að láta tvo aðila votta undirskrift.

Lögbókandavottun og Apostille vottun

Séu það kröfur þess ríkis sem ferðast er til að undirritun á samþykkisyfirlýsingu sé vottuð af lögbókanda eða aðrar aðstæður krefjist þess er hægt að óska slíkrar vottunar hjá sýslumönnum.

Um lögbókandavottanir er fjallað hér: https://island.is/stadfesting-a-undirskrift-eda-loegbokandavottun

Óski forsjáraðilar lögbókandavottunar á undirritanir sínar er hægt að notast við samþykkisyfirlýsingu. Forsjáraðilar fylla út reiti þess eftir að undirritanir þeirra hafa verið vottaðar.

Þeir forsjáraðilar sem veita samþykki þurfa að

• mæta í eigin persónu til sýslumanns,

• framvísa löglegum persónuskilríkjum (vegabréf, ökuskírteini eða nafnskírteini).

Athugið að aðili sem ferðast með barni þarf ekki að mæta með í lögbókandavottun.

Þá er einnig hægt að fá vottun lögbókanda staðfesta af utanríkisráðuneytinu ef gerðar eru kröfur um slíkt í því landi sem ferðast á til.