Sækja um endurprentun (samrit) ökuskírteinis sem er týnt, ónýtt eða af eldri gerð

Ef stutt er í endurnýjun einhverra ökuréttinda skal ekki sækja um samrit, heldur fara beint í endurnýjunarferli ökuréttinda.

Ef ökuskírteini týnist eða er svo illa farið að áritun, númer, stimpilmerki, ljósmynd og þess háttar sjáist illa, skal sækja um samrit ökuskírteinis.

Athugið að ávallt þarf að hafa plastskírteini meðferðis þegar ekið er erlendis.

Finnist týnt ökuskírteini, skal það afhent sýslumanni eða lögreglu.

Umsóknarferlið

Umsækjandi skráir sig inn með rafrænum skilríkjum og staðfestir að eldra ökuskírteini sé týnt, stolið eða gallað.
Ef gild mynd er til staðar í skilríkjaskrá (úr vegabréfi eða nafnskírteini) sem uppfyllir aldursskilyrði og/eða er úr nýjustu útgáfu ökuskírteinis, birtast þær myndir ásamt undirritun sjálfkrafa í umsókninni.
Þú velur hvaða mynd á að nota á ökuskírteinið og þarft ekki að skila inn nýrri mynd eða undirritun til sýslumanns. Í umsókninni velur þú hvort þú vilt fá ökuskírteinið sent heim á lögheimili eða á einhvern afhendingarstað sýslumanns.

Skila þarf inn nýrri mynd ef:

• Mynd í skilríkjaskrá er of gömul samkvæmt aldursskilyrðum:

  • 16 og 17 ára: ekki eldri en 1 árs

  • 18 ára: ekki eldri en 2 ára

  • 19 ára: ekki eldri en 3 ára

  • 20 ára: ekki eldri en 4 ára

  • 21 árs: ekki eldri en 5 ára

  • 22 ára: ekki eldri en 6 ára

  • 23-24 ára: ekki eldri en 7 ára

  • 25-27 ára: ekki eldri en 9 ára

  • 26 ára og eldri: ekki eldri en 10 ára

• Ef þú hefur breytt nafni eða kyni þarf að endurnýja skilríki áður en hægt er að nýta mynd úr skilríkjaskrá eða koma með mynd og gefa undirskrift á skrifstofu sýslumanns

• Einstaklingar sem ekki uppfylla skilyrði fyrir útgáfu íslenskra skilríkja þurfa að skila inn mynd.

Ef engin mynd birtist í umsókn eða rafræn skilríki ekki tiltæk þarf að skila inn pappírsumsókn til sýslumanns, ásamt:

• nýrri passamynd og gefa undirritun.

Passamynd þarf að vera:

• prentuð á ljósmyndapappír

• í stærð 35 × 45 mm

• með einlitum, ljósum bakgrunni.

Afgreiðslu og afhendingarferli

Afgreiðslutími ökuskírteina er allt að 7 virkir dagar frá því að umsókn berst og ökuskírteini er pantað

Hægt er að fá ökuskírteini afhent á eftirfarandi vegu:

• Sent í pósti (póstburðargjald bætist við)

• Sækja í afgreiðslu sýslumanna.

Stafrænt ökuskírteini uppfærist í Ísland.is appinu um leið og ökuskírteini er pantað, hægt er að óska eftir bráðabirgðaakstursheimild á pappír ef t.d. aðilar eru að taka aukin ökuréttindi eða eru ekki með rafræn skilríki.

Erlend ökuskírteini

Ekki er hægt að sækja um stafrænt ef um erlent skírteini er að ræða. Ef ökuskírteini frá EES landi hefur glatast eða verið stolið þá þarf að tilkynna það fyrst til lögreglu og koma með staðfestingu þess efnis þegar sótt er um á skrifstofu sýslumanns og fær viðkomandi útgefið samrit þegar ökuréttindi viðkomandi hafa fengist staðfest frá útgáfulandi.