Starfsleyfi leigubílastöðvar

Skilyrði starfsleyfis til reksturs leigubifreiðastöðvar

• Fullnægjandi fjárhagsstaða, metið út frá ársreikningi eða skattframtali umsækjanda

• Hafa fyrirsvarsmann sem uppfyllir eftirfarandi skilyrði:

  • Lögheimili innan Evrópska efnahagssvæðisins (EES)

  • Námskeið rekstrarleyfishafa um leigubifreiðaakstur (þarf að standast próf)

  • Gott orðspor, metið út frá sakavottorði. Ef umsækjandi hefur gerst sekur um alvarleg ofbeldisbrot er ekki hægt að veita leyfi fyrr en að 10 árum liðnum. Ef um kynferðisbrot er að ræða er ekki hægt að veita leyfi samkvæmt 1. tölul. 2. mgr. 7. gr. laga um leigubifreiðaakstur.

• Halda utan um rafræna skrá fyrir rekstrarleyfishafa sem eru skráðir á stöðina

• Vera með farveg fyrir kvartanir neytenda yfir verði og gæðum þjónustu

Breyting á lögum um leigubifreiðaakstur frá 1. júní 2026

Breyting á lögum um leigubifreiðaakstur nr. 120/2022 felur meðal annars í sér auknar kröfur til leigubílastöðva:

• Allir sem reka leigubifreið þurfa að vera skráðir á leigubifreiðastöð með gilt leyfi frá Samgöngustofu

• Leigubifreiðastöðvar þurfa að skrá allar ferðir rafrænt. Þar á meðal eru upplýsingar um upphaf og lok ferðar, leiðina og greiðslu. Gögnin þarf að geyma í að minnsta kosti 60 daga

• Rafræn skráningarkerfi stöðvanna skulu fara í árlega úttekt hjá óháðum aðila sem Samgöngustofa hefur samþykkt. Sjá auglýsingu á vef Samgöngustofu þar sem auglýst er eftir slíkum úttektaraðila

• Stöðvar þurfa að bjóða upp á ferli fyrir kvartanir. Farþegar eiga að geta tilkynnt óeðlilega hátt verð eða slæma þjónustu. Leigubifreiðastjórum verður skylt að upplýsa farþega um þessi réttindi

• Sömu kröfur gilda um leyfishafa sem eru skráðir á eigin stöð og leyfishafa með starfsleyfi til reksturs leigubifreiðastöðvar