Markmiðið er ekki aðeins að halda í ríka hefð jóladagatala heldur einnig kynna fyrir almenningi einstök skjöl sem bregða birtu á atburði fortíðarinnar og fjölbreytnina í safnkostinum. Þá er verkefnið enn fremur liður í að gera safnkostinn aðgengilegan og varpa bæði ljósi á varðveislu tiltekinna gagna og starfsemi safnsins.

Meðal skjala sem þegar hafa birst eru sýnishorn úr dóma- og þingbókum sýslumanna um áfengisdrykkju á aðventunni, umsagnir Kvikmyndaeftirlits ríkisins um kvikmyndir sem jafnan hljóta töluvert áhorf yfir jólin, bréf frá bónda dagsett 3. desember 1770 til Landsnefndarinnar fyrri um nauðsynlegur umbætur á íslensku samfélagi og handrit af upplesnum hádegisfréttum Ríkisútvarpsins frá 4. desember 1965.

Jólaskjalatalið er birt á Facebook-síðu Þjóðskjalasafns með stuttum kynningartextum og myndum af viðkomandi skjölum.