Tilkynning um eigendaskipti ökutækja á Ísland.is
23. maí 2023
Nánast allt sem þú þarft tengt ökutækinu þínu er nú komið á Ísland.is. Allt frá ökunámi til eigendaskipta ökutækis.
![](https://images.ctfassets.net/8k0h54kbe6bj/5mTVmox1ncbT8svDSopH50/bf0312ba4d8c7332c779662007f7f392/gss_2330-edit.jpg?w=50&fm=webp&q=80)
![ung_kona_undir_styri](https://images.ctfassets.net/8k0h54kbe6bj/5mTVmox1ncbT8svDSopH50/bf0312ba4d8c7332c779662007f7f392/gss_2330-edit.jpg?w=774&fm=webp&q=80)
Nú hafa tilkynningar um eigendaskipti ökutækja og meðeigenda ökutækja flust yfir á Ísland.is. Ferlið er að fullu stafrænt, hefur verið endurbætt og er nú mun notendavænna en áður.
Tilkynnt er um eigendaskipti ökutækis á island.is og þarf það að gerast innan 7 daga frá sölu. Ferlið er eftirfarandi:
Seljandi fyllir út tilkynninguna og greiðir fyrir skráningu.
Kaupandi/meðeigandi/umráðamaður undirritar tilkynninguna rafrænt.
Eigandaskiptin eru sjálfkrafa skráð í ökutækjaskrá.
Áður en eigendaskipti eru tilkynnt er mikilvægt að kanna stöðu ökutækisins með tilliti til veðbanda, tjónaferils og fleiri atriða sem útlistað er í grein um kaup og sölu ökutækis.
Á Mínum síðum Íslands.is og í Ísland.is appinu er einnig að finna helstu upplýsingar um ökutæki á borð við eigin þyngd, þyngd eftirvagna, hversu mikið bíllinn má draga ásamt upplýsingum um hvers kyns ökuréttindi maður er með.
Nánari upplýsingar má finna á Ísland.is.