Markmið frumvarpsins er að setja skýrari ramma um samningsgerð og greiðslur utan samninga, án þess að skerða réttindi eða ganga gegn gildandi samningum. Frumvarpið skerpir á skyldu Sjúkratrygginga til að byggja ákvarðanatöku á gagnreyndri meðferð og faglegu hagrænu mati.

Mikilvægt er að árétta að fyrirliggjandi frumvarp felur ekki í sér kollvörpun á núverandi fyrirkomulagi né að ríkið gangi á bak orða sinna.

Ákvæðin sem um ræðir hafa mótast með hliðsjón af reynslu Sjúkratrygginga af samningum við ólíka þjónustuveitendur. Þau miða að auknu gagnsæi í allri samningagerð Sjúkratrygginga og eru í samræmi við ábendingar úr stjórnsýsluúttekt Ríkisendurskoðunar.

Eitt ákvæði frumvarpsins, um skil ársreikninga og annarra fjárhagsupplýsinga, var sérstaklega rætt í samningaviðræðum við sérgreinalækna. Þar var um málamiðlun að ræða, en frumvarpið kveður á um auknar heimildir stofnunarinnar í samræmi við gagnrýni Ríkisendurskoðunar.

Ákvæði um hámarksgildistíma gjaldskrár er nú þegar í lögunum en fram að þessu hefur hugtakið ,,tímabundið“ verið notað og er það óheppilegt. Í umræddum drögum er lagt til að hámarksgildistími verði 12 mánuðir en líkt og ráðherra hefur bent á telja Sjúkratryggingar að það megi skoða hvort unnt sé að lengja hámarksgildistíma að einhverju marki frá því sem nú er lagt til.

Sjúkratryggingar leggja áherslu á áframhaldandi samtal og samvinnu við alla viðsemjendur með það að markmiði að tryggja öfluga og gagnsæja heilbrigðisþjónustu fyrir alla landsmenn.

Hér er slóð á frumvarpið í Samráðsgátt : Samráðsgátt | Mál: S-187/2025