Hér eru örfá dæmi um það sem við höfum fengist við á árinu:

• Ljósmæður heimsóttu um það bil 3.700 nýfædd börn og foreldra þeirra á árinu. Alls voru þetta um 21.500 vitjanir sem Sjúkratryggingar greiða fyrir til að tryggja velferð nýbura og styðja við bakið á foreldrum á fyrstu dögum barnsins.

• Tveir karlar yfir 100 ára fengu styrk vegna nýrra heyrnartækja á árinu en alls fengu 2100 einstaklingar á öllum aldri slíkan styrk. Við niðurgreiðum fjölmörg hjálpartæki til að bæta lífsgæði en tæplega 22.000 einstaklingar fengu einhver hjálpartæki til að létta þeim lífið á árinu.

• Um 50 þúsund manns heimsóttu augnlækna á árinu en öll þjónusta sérfræðilækna er mikilvæg til að tryggja heilbrigði þjóðarinnar. Þetta endurspeglast í því að greiðslur Sjúkratrygginga vegna heimsókna til sérgreinalækna námu um 9 milljörðum á árinu og er einn stærsti liðurinn sem við sýslum með. Næstum annar hver landsmaður hitti einhvern sérgreinalækni á árinu eða alls um 170 þúsund manns.

• Tæplega 2.200 aldraðir einstaklingar mættu í dagdvöl á einhverjum af þeim 46 stöðum sem Sjúkratryggingar hafa gert samning við. Tilgangurinn er að bæta lífsgæði með því að efla líkamlega virkni og félagslega þátttöku.

• Á árinu veittum við 3,8 milljörðum í tannlækningar fyrir tæplega 63.000 börn enda skiptir miklu máli að leggja góðan grunn að tannheilsu út lífið.

• 280.000 einstaklingar fengu niðurgreidd lyf af Sjúkratryggingum á árinu enda er það eitt af okkar meginhlutverkum að tryggja aðgang allra að lyfjum sem þau þurfa á að halda.

• Við tryggðum aðgang að sjúkraflugi fyrir landsmenn og greiddum neyðarflug fyrir hátt í 500 einstaklinga ásamt því að tryggja aðgang heilbrigðisstofnana að sjúkraflugi fyrir nálægt 400 manns. Þetta eru að meðaltali tæplega þrjú sjúkraflug á dag.

Við sendum okkar bestu óskir um gleðileg jól og megi nýja árið færa landsmönnum öllum gæfu og góða heilsu.