Samstarfið nær m.a. til útgáfu markaðsleyfa, skráningu aukaverkana, og eftirlits með fyrirtækjum og stofnunum sem sýsla með lyf. Samstarfið nær einnig til upplýsingakerfa og hafa margvíslegir samevrópskir gagnagrunnar og tölvukerfi á sviði lyfjamála verið þróaðir eða eru í þróun. Þetta samstarf hefur m.a. haft í för með sér að starfsmenn Lyfjastofnunar taka þátt og leysa verkefni í sérfræðinganefndum bæði á vegum EMA, framkvæmdastjórnar Evrópusambandsins og forstjóra lyfjastofnana Evrópska efnahagssvæðisins, HMA (Heads of Medicines Agencies).

Lyfjastofnun tekur virkan þátt í starfi Evrópsku lyfjaskrárnefndarinnar á vegum Evrópuráðsins í Strassborg (Ph.Eur.) og samstarfi lyfjaeftirlitsmanna Pharmaceutical Inspection Cooperation Scheme, PIC/S.

Evrópskt samstarfsverkefni

Lyfjastofnun er virkur þátttakandi í verkefni Evrópusambandsins sem er undir hatti verkefnisins EU4Health og nefnist EU4H11

Verkefnið er samstarfsverkefni 39 stjórnvalda frá 29 löndum á Evrópska efnahagssvæðinu og er styrkt af framkvæmdastjórn Evrópusambandsins. Þær stofnanir sem taka þátt í verkefninu eiga það allar sameiginlegt að fara með gæðaeftirlit með lyfjaframleiðslu og dreifingu í sínum löndum, líkt og Lyfjastofnun.Verkefnastjórn er í höndum austurrísku lyfjastofnunarinnar sem nýtur liðsinnis frá lyfjastofnunum í Frakklandi, Króatíu og Ungverjalandi.

Markmið verkefnisins eru að:

• Styrkja úttektaráætlun og eftirlit með eftirlitsstofnunum sem sinna eftirliti með lyfjaframleiðendum innan Evrópska efnahagssvæðisins á vegum JAP (Joint Audit Programme)

• Koma með tillögu um hvernig er unnt að bæta eftirliti með heildsöludreifingu lyfja í úttektaráætlun JAP

• Setja á fót samræmda þjálfun fyrir eftirlitsmenn

Verkefnið er fjármagnað af framkvæmdastjórn Evrópusambandsins. Nánari upplýsingar um verkefnið veitir Lyfjastofnun. Vinsamlega nýtið "Hafa samband" form á forsíðu þessa vefs. Að auki má nálgast frekari upplýsingar hjá austurrísku lyfjastofnuninni.