Heilsuskólinn veitir börnum og unglingum meðferð við offitu, og þeim og fjölskyldum þeirra er leiðbeint um þyngdarstjórnun og heilbrigt líferni. Meðferðin snýst um að kenna aðferðir til að

• ná og viðhalda heilbrigðri þyngd

• bæta lífsgæði til lengri tíma

• hvetja börnin áfram með styðjandi hætti

• ráðleggja um mataræði

• flétta hreyfingu inn í daglegt líf.

Ef tilfinninga- eða hegðunarvandi er til staðar er ráðlagt að leita meðferðar í viðeigandi meðferðarúrræði.

Viðmiðið í þjónustu Heilsuskólans

Börn og unglingar sem eru 2,5 staðalfrávikum fyrir ofan meðalkúrfu í BMI eða mikla þyngdaraukningu á stuttum tíma.

Inntökuviðtal

Í fyrstu komu fer fram inntökuviðtal sem tekur um 90 mínútur þar sem barn og forsjáraðili hittir lækni, hjúkrunarfræðing og íþróttafræðing.

• Heilsuskólinn er kynntur og rætt er um lífsvenjur.

• Farið í gegnum heilsufarssögu barns eða unglings.

• Hæð, þyngd og blóðþrýstingur er mældur og tekið er ummál mittis og upphandleggs.

• Barnið eða unglingurinn fær beiðni í blóðprufu.

Eftir viðtalið er þörf fyrir meðferð metin.

Meðferð í Heilsuskólanum

Í fyrstu komu eftir inntökuviðtal er málstjóri kynntur og barni og forsjáraðila kynnt næstu skref sem felast í því að barn og forsjáraðili sækir:

• Regluleg viðtöl hjá meðferðaraðilum Heilsuskólans.

• Hópfræðsla í eina klukkustund (3 skipti) þar sem foreldrar barna 7-11 ára mæta án barnsins.

• Foreldrar 12-18 ára barna mæta ásamt barninu (3 skipti).

• Þrír einstaklingstímar í markmiðasetningu þar sem barnið mætir með forsjáraðila.

• Ef barni hentar ekki hópaúrræði er komið til móts við það.

Eftirfylgd

Barni er fylgt eftir á þriggja mánaða fresti í eitt ár og svo einu sinni á ári eftir það eða oftar eftir þörfum.
Stefnt er að langtímaeftirliti í nánu samstarfi við heilsugæslu viðkomandi barns og fjölskyldu.

Biðtími

Vegna fjölda umsókna getur biðtíminn verið langur.

• Notið biðtímann vel og skoðið hvort fjölskyldan geti gert breytingar á lífsvenjum í samráði við tílvísanda.

• Kynnið ykkur ráðleggingar um heilbrigðar lífsvenjur á heilsuveru.

Ef upp koma breytingar sem valda auknum vanda, ef ekki er lengur óskað eftir þjónustu Heilsuskólans eða ef óskað er eftir frekari upplýsingum, vinsamlega látið vita á netfangið: heilsuskolinn@landspitali.is.